سلام ردية تسري مساري الذيب في كل ليل = من فوق هذيك الرجوم العاليه ياناس منزالها
يحدني هاجسي واحداه واطلب كل بدعن جزيل = واهل الوفى والمعرفه فالمواقف نطلب اوصالها

يامرحبا يالعصيمي من هجوسٍٍ ماتجي بالهزيل=مكانها عاليٍ ياصاحبي والناس ترقالها
هات السوالف يابن عاصم وشوف الدرب لا لاتميل=واهل الوفا والمعرفه ياعميل الخير يهنالها

دام البقا ياطويل العمر وانته لا رقيت الطويل = ارتاح وانضر سحابن لاتبجحلك بهمالها
ولا يهمك ليا منه زما بالحمل ياقف شعيل = ويشيل حمله وغيره يا طويل الباع ماشالها

ياصاحبي لاتعلّيت الطويل وقلت ماله مثيل=كرر وهات اطيب الألحان فوقه جر موالها
بعض الجمال يترزم بالحمل والحمل فوقه ثقيل=وبعض الجمال التعب من فوقها ثقله برا حالها

ابشر بطرق اللحون الي تميّل جاعدات الجديل = والي تنومس رجالن فالمواقف شاب عيّالها
تبا تبين الاصايل لاتحامت فالطريق الطويل = الي تقص الفيافي فالهضاب الشم واجبالها

الاوله روّحت ياصاحبي وابا اعتبرها سبيل=والثانيه لاتمر وتنتهي وتقول من قالها
ان ما نفع لاعب الكوره ياخالد يزهمون البديل=مير البلا ياعميلي كانها دامت على فالها

الاوله ياعميلي مايسويها يكود الذليل = الي ليا حميت القيفان عود يطلب اهزالها
لا تحسبنك وضعت السم يارجال وسط الصميل = انته شملت الرسايل والرسايل شان مرسالها

البادي اظلم وخلق الله ياخالد يعرفون الدليل=والا عميلك تراه يجنب الهزلات وجدالها
انا اشهد انك تجيب الطيبه دايم على اخر موديل=لكن من يحفر الحفره لغيره طاح في جالها