هلا يا مرحبا يا شاعرٍ تستاهل الترحيب=بدون قصور في باق الرجالي واسر يا ساري
انا اشوفك تجي و تروح عنّا و تحضر و تغيب=وانا في لازمي واقف لحالي واسر يا ساري

يدوم لك البقا ياشاعر(ن) مافيك شك وريب=من أهل الجود وافين الخصالي واسر ياساري
ظروف الوقت ماتسمح لو إن الراس منها يشيب=ومن دون العدا يسد الموالي واسر ياساري

والا يا ذيب في مسراك تبشر لك بخوّة ذيب= يدلّ الدرب في سود الليالي واسر يا ساري
ترى موضوعنا اللي تعرفه يحتاج له ترتيب=ويصبح فعلنا مضرب مثالي واسر يا ساري

وألا ياذيب ياللي فيك ظني مايخيب يصيب=وجر اعواك في روس الطوالي واسر ياساري
ليا منا بذلنا الجهد ما فالدرب شي صعيب=وتبشر بالسعد والحظ عالي واسر ياساري

ترى ما هو غريب الطيب في راع الوفا والطيب=يزين الكيف في صفر الدلالي واسر يا ساري
انا صيّحت في ضبّاط وحدة مركز التدريب=وكلٍ قال ابا ابذل كل غالي واسر يا ساري

أنا مجرب رجال المعرفه طول الزمن تجريب=لهم شأن وفعل في كل حالي واسر ياساري
أخبرك مهتم بكل الأمور وقمت بالتعقيب=ومار الوضع باقي مايزالي واسر ياساري

ترى اللي ما يطوّع في حياته كلّ شيّ صعيب=مع اهل الطيبّه ماله مجالي واسر يا ساري
ترى ما باقي الاّ حول شهر و دون بالتقريب=ولكنّ الله الله فالجزالي وسر يا ساري

ترى كثر العبر تأدب بنادم كلها تأديب=وتفرق فالحرام وفالحلالي واسر ياساري
ليا نادى المنادي والله إنا فاللزوم نجيب=ولانبني على الجرف الهيالي واسر ياساري