مرحبا لو الخوي معاد ياثق في خويه=وانت يالفالح تقلب فالزمان القلباني
من بعدهاذي ترى الذمه من الذمه بريه=اخر الايام يارجال كنك ماتباني

البقا بالصاحب اللي كل نيّاته رديّه =يالعتيبي ما يكنّ القلب يبديه اللساني
انت مالك شغله الاّ رايحٍ يمّ الحويّه= رايحٍ يمّ الحويه جاي من يمّ المحاني

من قديم الوقت مالك لاشداد ولامطيه=واخر الدنيا طمعت الجدي وسهيل اليماني
القضيه طولت وازريت في حل القضيه=مامعك فالامر حيله خلها والعمر فاني

انت جاني منك يا نايف ولد ملحق خطيّه=ليش تهرج في قفايه وانت واحد من خواني
احمد الله ما غدالي لا كثير ولا بليّه=كاسبين الطيب والنوماس من ماض الزماني

الخطاء ماهو بمني ماتمشيها عليه=من حياتي ماتكلم بالردى فالمودماني
المعاني في نحيه وانت ساري في نحيه=وانت شاعر مار اظنك تاتغر من المعاني

الشهود اثنين والضيقه على نايف قويّه=لو كذبنا فلان يقول روح انشد فلاني
انت شاعر نظم وتجرّ اللحون السامريه=والمعاني خلّها عند العصيمي والسناني

الشهود اللي معك تبطل شهادتهم شويه=وعرف ان العلم واحد لاتدور علم ثاني
المعاني حاميه ياصاحبي والنار حيه=وانت من بعض السوالف خابرينك ماتداني

كيف تبطل وانت ما جبت العلوم الواقعيّه=اقرب الناس الك يشهد لي ويضمنها ضماني
المواقف لو توردنا على حوض المنيّه=ما نجنّب دام حنّا من طويلين اليماني

حجتك ماهي بحجه وانت ضيعت الحميه=مار يارجال لاتبلش عريبين المجاني
الله انه لايبارك فالجمال الساحليه=ماتشيل احمولها لوسقتها بالخيزراني

الحقيقه ما انت يا نايف على قدّ الحضيّه=من يمدّ العشر لا تجزاه يا نايف ثماني
انت ما عندك على شيل الثقيله مقدريّه=كلّ ما ثقلت حمولك قلت انا هذا مكاني

انت راعي مار تالي الوقت ضيعت الرعيه=والكلام اللي تقوله في خويك ماخفاني
حظنا طيب وعالي وانت حظك في طميه=لوحداك الوقت يارجال مثلك ماحداني