ياسارح البال ,,طاب البال والصيد طاب=مدري تباها طبخ ,,ولا تباها شوي
علمتك أبها ,, وقلت المقبلات العذاب=مادام مأنتب ولد عمي ولا أنت بخوي

الشاعر اللي رفع كفه ويبغا العذاب=مدري يحب العذاب شويش والا قوي
في مامضى قلتلي هرجه ولاهي صواب=والحين جاين تفل الصحف عقب الطوي

ياللي بنيت البنى فالبني شي يعاب=ميز بها والعيوب البينه تستوي
وان كان بالك سرح لا تامن من الذياب= اللي على عالي المشراف تعوي عوي

ماحولنا لا عيوب ولا نحب الخراب=وليا وردنا العدود الطيبه نرتوي
مايسرح البال فالواجب ولابه غياب=دايم على نطحة الفريس بالي هوي

ترى السرح ياوسيع العرف ..عيب الشباب=وراعيه ماله على علباه ,,غير الكوي
خابرك فالنطح,, قرم ينحسب لك حساب=ومن قولة أهل مصر ,,(فيك القداعه أوي)

نسرح مع اهل القصيد بفكرنا للسحاب=نحسب على اهل القصيد ولاحسبنا غوي
بالسيف ننطح ليامن صار عج وضباب=لاصار لأهل الرمي فالجو صوت ودوي

مادامت دروب خلق الله ,,بحسب الكتاب=يامستوي عالنقا ,,ولا يجي ملتوي
قد السوال الموجه ؛؛منك هات الجواب=أنته تبا المنعوج ولا تريد السوي

مادام ياصاحبي وجهتها للصعاب=اصبر على مايجيك ولاتجي منزوي
لاصرت يامرجح الميزان تبغا الثواب=اخذه على مايجيك ولايجيلك صوي

ماننزوي والعصي ,,طب لعوج الرقاب=اللي لواها الجرب والسم شر اللوي
وش نرتجي وانت فالك مثل فال الغراب=ياشين حظ اللذي,, يقعد في دربه شوي