مرحبا عداد ماهب ذعذاع الهبوب=والمواقف عزها دايمٍ برجالها
يالعضياني ترا ماتضيقبنا الدروب=شد حيلك والاصيله تبا خيالها

البقا ياللي ترحب عدد نبض القلوب=بيع واشتر والنشاما بروس اموالها
فيه بارق فالشمال وزوابع فالجنوب=والعرب تاخذ جزاها بحنس اعمالها

الله اللي يعلم السر علام الغيوب=كل كلمه يالعتيبي يجيك ابدالها
بنت ابو زيد الهلالي لها عشرين ثوب=مار شرهتها تعود على رجالها

ان شعت النار جاك القدر من كل صوب=حملتــــك لابد يالاجودي تشتالها
من كفلها يحتميها بساحات الحروب=يمنع العدوان عنها ويحسن فالها

لا تشب النار منت بعلى النار مغصوب=كان عندك حيلةٍ لازمن تحتالها
انت يارجال مافيك عيب من العيوب=والعلوم اتمر مدري متى تصحالها

الشروق اللي تظنه يشابه للغروب=يختلف والشمس ميّز جميع احوالها
يا هجوسي لين اعرف الصدوق من الكذوب=استريحي عن قصار الطرق وطوالها

لازمٍ نعطيك يا صاحبي حتى تتوب=وشتبى من دلةٍ شاربٍ فنجالها
ادري انك شاعرٍ في المواقيف محسوب=والسوالف طيعني لا تعقد احبالها

ما شربت الا قراطيع من ديس الحلوب=والبسيطة ماتعدي بروس جبالها
ليت نايف فالسفينه يدور له ركوب=البحر قبله رجالً كثير اغتالها

لا تقوله والبحر لا تحسب انه يروب=والمواقبف الصعيبه ترا حنا لها
ابشر اني ياحمر العين مانيب امغلوب=مار بعض الناس يالله تستر حالها

والله انا حاسبينك من حساب الشعوب=مانت عمً للجليله ولا انته خالها
فوق كاهل طيب الراس يا كثر الذنوب=غترته من غابر الوقت مال عقالها