سلام الله سلام الخاطر المشتاق=على وضح النقاء والنيه النيه
علي فلاح فالح سفّط الاوراق= وانا بالعب معه قبل الوداعيه

هلا يا مرحبا من خاطرٍ ما ضاق=بعلم الطيب وعلوم الشهاميّه
علي فلاح فالح شاعرٍ عملاق=ولا ياخذ بيوت الشعر عاريّه

على علم الوفاء راع الوفاء سباق=ماهوب اللي يقول شويه شويه
علي فلاح وده يقطع الارزاق=بعد ماراح مع شلة حرامية

نجيب الغاليه من غالي الاسواق=لحيث الغاليه فالسوق الأصليّه
لزوم تقول والله والله الخلاّق=حقوق الطبع محفوظه و حصريّه

مثل مال الردى للطيبه عشاق=ويابين الفرق في هاذي وهذيه
بعون الله نبا نقطع يد السراق=طرحنا السارق المزاح ووخيه

ابو صافي شبيب أشعر ذوي زراق=منه جاني خبر وعلوم سرّيه
ترى علمك هذاه لعلمنا مصداق=و رى ما قلت والله انّها ليّه

وهل المرقاب يكفي عنهم البراق=عطاه اللي خلق قدره الاهيه
ليا ساقوك في غير السنع تنساق=ترى ماهيب لعبة طاق طاقيه

أثرك انته ما غير لموترك سوّاق=من الدمام لحدود النعيريّه
ليامنّه دخلك الشكّ و الارهاق =لو انّه فيك يدخل ما دخل فيّه

يقولون العرب ياطاق ياطرباق=كنايه للمخفه في تماديّه
علي في كل ليل يشيل مايطاق=وحمله للعرب بانت مواريّه