سلام في منتدى ربعي كعام الحريب=اللابة اللي لهــا فالمجد قسم السنام
يطيب سوق المعاني والسوالف تطيب=بين العوارف وكلن يلتزم بالنظام

يامرحبا ياهلا ..والقسم ماهو غريب=على عتيبه هل العوجا رفاع المقام
ياطيب هرج الرجال المعتبر والمصيب=خص ٍ ليا قاله العمده في وقت الدوام

دام البقا للنشـــاما من بعيد وقـــــريب=والنشمي اللي تقدم يحتزم بالحـــــزام
الريع فيه النمارة والجبــــــل فيه ذيب=ومرجح الله يعينه بعد سمــــــــّى وقام

احزامنا ذاخرينه للزمان الصعيب=يوم ان بعض العرب ناره علانا سلام
ومدام وانك تحلم وانت وسط القليب=ماهمنا ماتقوله دام وانك مدام

ماكنت اظن الهقاوي فالاوادم تخيب=حتى لقيتك تدرق تحت جنح الظلام
العقرب اللي تحط السم وسط الحليب=ما نقصت من مقامات الرجال الكرام

اللي يبني بيوت الطين وسط الشعيب=لا يامن الصبح تصبح فوق راسه هدام
ماللجروح العطيبه غير طب الطبيب=ولا للنفوس المريضه غير حد الحسام