يا مرحبا ياعقاب لا ترتاع والمسرى طويل=انته ليا جات المواقف يالعتيبي قدّها
شفت المخايل خيلت والسيل عيا لا يسيل=وان كان تدري بالخبر هات العلوم وودّها

الك البقا يانايف الروقي وخذ علمٍ جزيل = ماباح سدّي لو كثير الناس بيّح سدّها
الطرقي اللي سار فالديره ترا قبلك دليل = عينن يداويها وعينن يبن ملحق سدّها

ياعقاب حنا مانبا منك الكلام المستحيل=لكن ياراع المطية لاتميل شدها
حنا رسمنا لك هدف معروف ياراع النجيل=مار انتبة لاتبني الامجاد ثم تهدها

مانيب اميل ولو كثير الناس فالطرقه يميل = لكن لاجت هرجةٍ واجب عليّه ردّها
اثرك لك نيه وانا خابرك رجّالٍ حليل = طافت عليك ارتح وعينك لاتزيد تلدّها

كم قلت لك بعد شرار الزند عن خشم الفتيل=وكم قلت ياراع السوالف لاتعدى حدها
ترا الضماير صافية لكن يازبن الدخيل=النا س في شقر العصا ماودها ماودها

انا معك لكن حطيتلك من دوني عميل = لا شفتني ناديت له قبل العلوم اتعدّها
عينك تناظر للجدي خلك مكانك ياسهيل = تغيب عام وعدت ثاني للنجوم اتضدّها

انا عميل اهل الوفاء ماعامل الراس البخيل=وانتة ما ذمك في المواقف واليمين اتمدها
ترا كثير الناس ماجالة على الدنيا حصيل =ياعقاب لاترجع سوات اللي تعشت بدها

ان طول المشوار والمسرى تقول الليل ليل = دوّر على روس النوايف وادِّرق في سدّها
مايرتكي للكايدات من الحمول الا شعيل = ومن القهر لاتكون مثل اللي تصفّق خدّها