سلامي على العتبان من دون تقصير=وسلامي على كل العرب من لساني
سرى اليل ياشعار مافيه تاخير=وحاضر بحاضر حسب رد المعاني

هلا مرحبا ترحيبةً كلها خير= بروس الطوال ولا تجي فالطماني
ليا زارنا الطيب نحرنا له بعير=واذا غيّر النيه حصل علم ثاني

انا طالبك يالله بحسن تدابير=وخير ومعزه ما نجيب الهواني
توقع على هونك ولاتعكس السير=ومشوارنا مطوله يامودماني

عسى لك عزومً توصلك قمة النير= وتقدر تجازي الطيبة بالحساني
حصان الزناتي لو تطول المشاوير=يعنــّه وعشره ماتعود ثماني

عزومي قويه مثل ضرب البواتير=تهد الجبل لكن عطني ثواني
حصان الزناتي لايهبد المسامير=علشان مايرجع كما البغبغاني

يفز الاصيل اللي يشق الطوابيــــر=وراعيه ما يصطـــاد غير السماني
قصير الحبل ما يجذب الما من البير=وراع السفينه ماش قدمه مواني

ترى الحر الاشقر فوق رؤس المواكير=وبعض الحباري في نفود المحاني
تجمعكم الي صار كله مخاسير=ولافادكم في شي ياليل داني

اشوف ابرق الجنحان ما يقدر يطير=فضخ قلبه القناص بالجبخــــاني
تهب الهبوب ولا تحرك شمنصير=وضرب القنا فيكم يهز الكيـــاني

المشاركة الأصلية كتبت بواسطة البواردي (المشاركة 477565) هلا مرحبا ترحيبةً كلها خير= بروس الطوال ولا تجي فالطماني ليا زارنا الطيب نحرنا له بعير=واذا غيّر النيه حصل علم ثاني