يالله ياغافر خطايا عبيده = ياحاجزٍ مابين بحره وقاعه
ارجوك باالدنيا حياة ٍ سعيده = وبالآخره رحمتك يوم المراعه
إذا حصد راعي الحساب الحصيده = وتفقد المحصول راعي الزراعه
اعمالنا من غير عفوك زهيده = انته رجاء الإنسان حين انصراعه
وان كان كلٍ قام يفخر بصيده = يوم ان كل ٍ من حريبه متاعه
سر ياقلم سجل مشد النشيده = نبي نجدد مامضى عن ضياعه
عليك تصريح الخبر وتحديده = وانا عليّه صنعته واختراعه
سجلي ابياتٍ نظافٍ وكيده = بكتاب عن نقد اللواعيب راعه
حاول يصيرالبيت جمله مفيده = حتى يليق لمن قراه استماعه
ابرسله لا بان جده وجيده = ليا منبع الحكمه وبحر الشجاعه
اسندت لأبن حميد صدر القصيده = ويصدر عليها الحكم بعد اطلاعه
سلطان ابن جهجاه شيخ البديده = حلال صعبات الأمور ابراعه
شيخ ٍمحابيل العداء ماتصيده = ولوهاجمه وقته بحربٍ مااطاعه
ولو شاف غاراته وسمع تهديده = ومخالط ٍ بعض النوايا لكاعه
بثنا المحافل والعيون الحديده = ماهوب في صعب المواقف رعاعه
وان جا نهارٍ فيه صايد وصيده = هوقايد الهيلا نهار الصعاعه
هو قايد اليوم الكبير وعميده = ليا صار بالميدان شريه وباعه
امارته ماهيب بدعه جديده = بالجود والأمجاد ياطول باعه
له راية ٍ بيضاء عتيق ٍ عتيده = وعمودها فيه الرها با رتفاعه
رايه يسلمها الكبير لحفيده = نعم الوديع ونعم ذيك الوداعه
تركي سمع في وسط نجدٍ بجيده = ولا احدٍ يجيها الا يسوق الرتاعه
من دونها قومٍ عصاة ٍ عنيده = واميرهم ماهوب سهل انصياعه
وكتب مكاتيبه وطرش بريده = وساس الأمور بكل حلم ووقاعه
وحاول بشتى الطرق يقنع ضديده = لكن عن رايه ياكود اقتناعه
وبعد انغلق باب المساعي الحميده = شب الشعار وشاف راي الجماعه
وقالوله ارسلك بيان بجريده = رد النقا لاهل النقا بالاذاعه
ان كان يبغى الحرب حنا نريده = وفينا ليا حمي الوطيس استطاعه
لابد مانرفع يده عن رصيده = وش عاد لو حصن حماه بدفاعه
وشن الهجوم وصار تركي عقيده = وصمم على حرب الحريب ونزاعه
وتواجهوا والله فعل مايريده = واحد ٍ كسب واحدٍ خسر له بضاعه
تركي كسب دار ٍ عريض ٍ مديده = وخصمه كتب للدار حامض وداعه
وا فعال ابن هندي بنجد ٍ مجيده = ان صارللحرب الضروس اندلاعه
محمد لايا حكت حديده حديده = مافيه عن وجه الحريب انهزاعه
شيخ ٍ يجندل في المعارك قنيده = فعله زرع بقلوب الاجناب راعه
جدعة قبيله في اللقى ماتكيده = بالسيف من سرج الجواد انجظاعه
اما قطع يمناه ولا وريده = ولا بحد السيف يبتر خناعه
وليا عمد جمع ٍ هدم منه حيده = وليا انهزم خصمه يعاف اتباعه
علط الأسنه باللقى ماتصيده = تقول معطيه الكريم المناعه
يا ما ذبح يوم الرحى من فقيده = وخمسين من خيل الطنايا قلاعه
محذِ اليدين الفارغه مايفيده = من القيوم يحذي مفلسين الجماعه
يريد صعبات الأمور وتريده = ليا صدعن صعب الأمور الزعاعه
ولأبن بجاد بنجد سيره رشيده = رمزالمهابه والتقى والقناعه
شيخ ٍ نشر بين العباد العقيده = واعلن منار الدين واشرق شعاعه
ومن شذ عن درب الجماعه يعيده = بالوعض والا بالسلاح ارتداعه
كم شيخ قوم ٍ حط بيديه قيده = حتى استقام الشيخ بعد امتناعه
وقاد السرب لإ خضاع من لايفيده = عن الوعظ والإرشاد فيه انقطاعه
يالله عسى روحه بعفوك شهيده = حيثه عمل بكتاب ربه واطاعه
ولهم قبيله كل فن ٍ تجيده = فالحرب لاعم البلاد اتساعه
بالسيف والرمح الرديني طريده = وهدف ٍ يشيلن الهدف بالسراعه
وشلف ٍ على قب ٍ عراض ٍ حديده = قبل يجي عصر الفضا والصناعه
عاشت بنجد سنين جرد ٍ عديده = وجيرانها ناوينها بالقطاعه
محفوفة ٍ من كل صوب ٍ بمكيده = وقوم ٍ لهم في كل يوم ارتباعه
من احزاب من كثر العدد مستفيده = هذا يهاجمها والآخر ارداعه
مر ٍجمع عبده ومرٍ عبيده = مرٍ هل العارض تميم وخزاعه
ومرٍجمع علوى وعلوى نكيده = وبريه هم واخواننا بالرضاعه
لكن ردت كل جمع ٍ بكيده = وكل ٍ تبرى من حليفه واضاعه
قامت ترد الصاع صاع وتزيده = كل ٍ تكيل اله المنايا بصاعه
واقفوا لهم مع كل فج ٍ سريده = السالم اللي راح يسحب كراعه
وارست قواعدها بنجدٍ وطيده = وتخيرت مثناة نجد ورفاعه
برقا وروق الهم مواقف فريده = وفيهم على جمع الحريب اندفاعه
مثل العضيد اللي يساند عضيده = والجمع دايم عزته باجتماعه
يلجاء لهم من كان حمله يكيده = من الخوف والا في ليالي المجاعه
برقا هل الروز الثقيل الوحيده = ليا بنى حرب القبايل شراعه
اليا واجه الموعود راع الوعيده = وتعانقت حدب السيوف بشناعه
يا ما نحوا بسيوفهم من بديده = عن نجد يوم انه تقانب اسباعه
دقلاتهم جمع المعادي تبيده = ليا حاربوا جمع ٍ يتم انقشاعه
مثل الخيال اللي مزونه سديده = سيله يطم المنخفض والرفاعه
واولاد روق اللي خطاهم بعيده = اللي لهم كزالمجوخ ولاعه
قطاعة الفرجه ليا جت شديده = يوم ان كل ٍ نجدته من ذراعه
من اللي خذا طرش الحفيف وعبيده = وهفه وتفه من شفاتٍ لقاعه
وليا بدا زحف الحديد لحديده = عا داتهم كسب النصر وانتزاعه
وقعة طلال ام العلوم الأكيده = بالكتب سجلها جهاز الطباعه
يوم ان ابن فيصل نواهم بكيده = وسحب مطير ومن يحب الطماعه
وبعد انتهى دور السبر والقعيده = وقالوا هل الرايات للخيل فاعه
لبسوا دروع ٍ محكمات ٍ جويده = وسلوا سيوف ٍ مطعمه سم ساعه
وردوا شديد الباس عما يريده = واقفا يحث مع الخريمه رباعه
وليا ولوا خلوا للأعداء شريده = ويشهد على ميدان معتق ضلاعه
شيمة عرب حتى المحارب تفيده = ليا ذل تترك له طريق انجلاعه
هذا بيان ومصدره من جريده = جريدة الأخبار ساعه بساعه
بأقلام لا عجله ولاهي بليده = مأمونة الاطراف عن كل تاعه
لا تنقص الواقع ولاهي تزيده = كل ٍعلاماته على مااستطاعه
عديت بعض اللي نويت تعديده = وكشفت عن وجه المجلد قناعه
وانهيت بالصفحه مطاف النشيده = وصلوا على صاحب مقام الشفاعه

وصح لسانك الشاعر الكبير / كديميس

والله يعطيك العاافيه

يعطيك العافية أخوي نامي على هالنقل الرائع لقصيدة للشاعر الكبير

كديميس العصيمي