يالفالح انته مثل ابوزيد الهلالي بالفعول =لكن لا جاك الجذع ضاعت علومك كلها
يأهل المحاني لي عليكم حق من حول لحول =بزياره تدبل كبود وكبد تشفي غلها

الله يبارك فالجمال اللي يشيلنّ الحمول=وانته جذع لا صارت الحمله ثقيله خلها
اهل المحاني يا طويل العمر شعارٍ فحول=لكن قل للي يدفونك ماهوب احسن لّها

عزالله ان الكف من يمك وانا اخوك مغسول =أصبحت علة فوق ربعك كل ليل تعلها
لولا الحياء لاسفـه صحيبي فالكلام اللي يقول =كلمتك واانا أخوك روح احفر لها وادفن لها

لا قلتها قلتلك يا سبحان وزّان العقول=ادخل تحت ظل البيوت اللي يظلك ظلها
بعض اللّغوز ايجيلها ياصاحبي سبعة حلول=وانته تخيّر فالحلول اللي تبيه وحلها

دام الشداد مورثه جدي وانا راع الذلول=لاتغترب لو المحاني والفراع احتلها
اللي بدون ثبوت قفل فوقها سبعه قفول=والا سيوف الحق في يوم الملاقاء سلها

ما تثبت الحجه بلا برهان وشهودٍ عدول=والحجه اللي ما عليها شهود فالماء بلها
حنا سبحنا في محيطات الشعر عرضٍ وطول=واليوم ما تمشي عليه غير انا صاحلّها

الوقت داير والليالي في طلوع وفي نزول =يالفالح ان جاتك مقابيل احتزم واقبلها
سبحت غبات البحر لكن وضعك في ميول =يامل عين (ن)ترتجي منك النصر ياملها

المشاركة الأصلية كتبت بواسطة مرزوق العتيبي (المشاركة 338261) ... . صفحه مليئه بالابداع .... لله دركم ... بحرين متكافئين ... ...