الليله الكبتن امسى له بثوبٍ جديد=واثيابه التاليات اطيب من الاوله
مالك ورانا فقيد ان كنت فاقد فقيد=والعارفه ما يدوّر شي ما هوب له

حي الله الشعر.. والشاعر.. وبيت القصيد=وثيابنا فايحه بالعز والمرجله
فقدت الي يمّكم ياروق سيفً حديد=والسيف ردّوه ياهل كشب مانتم هله

العام انا قلت لك يا اخوي رايٍ سديد=وانا ادري انّك تعرف العلم ما تجهله
هذاك عنكم بعيد الدار وانتم بعيد=وان كان برقا تهمقى سيفنا مشكله

يالفالح اخبرك جندي في صفوف العقيد=اما انقض البيت يارجال ولا أفتله!!
انا عطيتك ريال ولا نقص فالرصيد=لولا ريالي ماتلقى في يداك هلله

ما فيه داعي نكرر فالعلوم ونعيد=الحمل جاهز ونوّخ يا جمل واشتله
امنين تعطي ومالك يالعتيبي زهيد=التمر ما ينجني من شجرة الحنظله

يالفالح اهيد وجنون البسيطه تهيد=اليا قرينا عليها الايه المنزله..
التمره من النخل والنخْل خضر الجريد=تحمد الله لاجاك من القصيم نخله!!

ان عوّدت للقرايه ما انته بمستفيد=لابد ما اقرا عليك بسورة الزلزله
انا احسب انك ذكي ما كنت اظنّك بليد=من ثقل غلطتك في ملفّك مسجّله

خابرك تقراء وتذن بالعرب فالمسيد=وتلخطب اقرايتك فبداية البسمله
والناس تشهد على ماقول ..والله شهيد=راع الجمل يعرف الجره لا ضاع جمله

يالجنّي اللي تشكّل وانت شخصٍ وحيد=انا ما ابا فالطريق ادفن لك القنبله
لو كان يشبه لاهل عسفان ولا قديد=يمكن نودّيه للتحليل ونحلله

ماني بجنّي ..وشيطانك يافالح مريد=وان كان عندك قنابل ..حقك السلسله!!
ماطوّر اهل الطرب ياكود الاطرش فريد=اللي لغنّا ..جماهيره لها بلبله!!

لا والله الا بعد جني وراسك عنيد=تلعب على كل حبل وطحت فالمحبله
ما باقي الا تقول انّ خالد ابن الوليد=اصله من السيل والبيت العلوّ منزله