مرحـوم يااللي ماله أمثال بالنـاس = مرحوم ياللي فاز بأحسن خصايـل
بالدين وافي وبالكرم ماله أجناس = ولاهوب يسمع قول قيلـ(ن) وقايل
ومن خلقته ما قدّم الخط بلاّس = ولاقط قالوا فالمحاكم يحايل
عارف حقوقه وياخذ الحق بقياس = وإن جاه عايل هو عمى عين عايل
من غيرشكوى وكتبـ(ن) بقرطاس = بالصدق والصملة ينتهي كل مايل
شيخـ(ن)ولد شيخـ(ن) شهدوا له الناس = شارع أبوه مورخـ(ن) له مثايل
أخذ خويه غصبٍ دايخ الراس = قول المطيري يوم شاف الهوايل
من الحبس جابه قهر بأشهب ألماس = قهر الشريف ومن معه من قبايل
وصنهات عقبه فعله يرفع الراس = بالبذل والكرمه لمن جاه سايل
ليا جاه ضيفـ(ن) من أية أجناس = يقوم بالماجوب ولاله يسايل
يذبح له الحايل وبنٍ بمحماس = وترحيبتـ(ن) من قلب راعي الصمايل
ماهو مرائي ناس ومسيب(ن) ناس = يكرم لوجه الله ولاهو يخايل
يالله يالمعبود ياجامع الناس = تعطيه ماعديت لأهل الجمايل
أنت الكريم وكرم غيرك أفلاس = وأنت العليم بكثرها والقلايل
وصلاة ربي كل ماهب نسناس = على نبي(ن) وضّح إلنا الدلايل