قال ابن مشرد من جزايل مثايله= قيلاً يعرفون العوارف دلايله
طيّر من اوكار الضماير قصيدها = نوبن يخايلها ونوبن تخايله
في جو هاجوسن تردم سحايبه = يبرق له الهم في مثاني مخايله
قيلاً سقيته مهجتي يوم فيّضت = وديان قلبن سيّل الهم مسايله
وحطيت له في بكرة القلب منزل = على الجال من فكرن توافد نزايله
نزايله من كل فج ٍ وصوب ٍ ووجهه = دقت مناسبها ولاهيب حايله
قلته عقب ماصرمد الهم من البطا = حدب الضلوع اللي فوادي تشايله
اليا شفت فعله قلت يادافع البلا = ادفع بلاه ونجني من فعايله
يالله دخيلك رد كيده ابنحره = ثم ارد حظه و اطرحه في حبايله
اليا هاجت افكاري وشبت وقيدها = دهاني الهم في عظايم هوايله
هم ٍ جلب خبث الروابع ثقيلها = اطاوعه من عظم شانه وأحايله
يجرح فوادي مابيمناه صارم = وترجح على مكيال وزني مكايله
واقول دور مرتع ٍ مرجع ٍ به الحيا = خضار عشبه ماتعين مثايله
مالك ومال الارض لاصفرّ عودها = عاين ضعنها قام يطوي زمايله
عنها العرب سارت ظعاين جموعها = صاحت على المرحال واقفت رحايله
ارض المحلّ والوقت ياشين عيشها = ليا شح براق الحيا في فضايله
دور على قلب ٍ خلي ٍ تغرشده = في صدر بواق ٍ من الناس عايله
ولا انته بلاقن كود من ضيع الجدا = اللي على ربعه يسنن سلايله
وبيبان قلب الحر بالقفل مقفله = بهموم ماهي مع مدى الدهر زايله
اهمومن على نيل المعالي وعزها = يمناه للعليا والامجاد طايله
مايردعه من دونها سو عاقبه = لو هدة ٍ فيها دمى القوم سايله
تسليت بالماضي وطيّب سوالفه =على حاضرن ترعى المذله خمايله
وعشت في وهمن ولاهوب واقع = وبالصبر قمت اجمع شرايد جفايله
واقول بالله ارتعي لاتريعي = عسى بقى من عسر وقتك قلايله
قد قيل مرباع النفوس بهواها = وخير الهوى من حصل العز قايله
وياقلب انا الحالك شفيقن وحسرتي = عليك في دنيًا عن الطيب مايله
اللي تباه وينبسط به خفوقك = جيته ولا غيرك من الناس جايله
كلاب حواء قالو انه تخلف = يعدون من ضرب الجهاله عمايله
والحال مما به من السقم كنه = شن ٍ قطر ماه ورموه بقوايله
والعين كن بنونها حامي القذا = شكى الهزوم وراح يذرف بلايله
ياويح قلبي لالبس ظلمة الدجى = لاقام يرسل لي عجايب رسايله
لحى الله جواب البين والبعد والنيا = ارخى على قلبي ثقايل حمايله
وسقى الله ليال ٍ يبهج الصدر ذكرها = يطرب لها من شتت الهم وسايله
وانا احمد الله يوم فضله غمرنا = بقول الحبيب ازكى البشر في شمايله
لن كان صاب الهم والغم مسلم = تكفّر على نفس ٍ من الذنب نايله
وصلاة ربي عد ماطار طاير = على رسولن ماتعدد جمايله

نوح صقر العتيبي