ناحت على الغصن ورقا والجروح اجداد =والبرق شامي ولحظ العين يمه سرى
والليل سدل جناحه يا جناح الهجاد =والهجس تحت الضلوع العوج باع وشرى
ادله النفس لا ذعذع نسيم البراد =وان قلت جرحي برى لله جرحي برى
انادم المسبحة وانثر حروف المداد =لين الورق من حنينه حنت المحبرا
كني من الليل ماعرف غير لون السواد =وكني من الدرب ما عرف غير طلعة كرى
على سنام الزمن شديت كور الشداد =لاخمني هاجسي والا طرا لي طرا
ايام اطرب لها.. وايام تبغى جهاد =وايام صلفه ولا يذري معاها ذرا
اسوق رجلي مع اصروف الليال سناد =اموت واحيا ولا ارجع في طريقي ورى
حرام ما هين راسي لو كليت الكداد =والعفن مهيون راسه لو عليّ زرى
الله لا وحاجة من كف ظفر جواد =والموت من حاجة السامج عديم القرى
الكل جرح دوى.. والكل جرح ضماد =الا الكرامة تموت وجرحها ما نبرى
وش خانة الدلة الصفرا بليا قناد =لو كان يبرا لها العنبر مع المبخرا
اما قدحت المعاني مثل قدح الزناد =والا رثمت المعاني تحت خد الثرى
الحر يشره على الجزله نهار الهداد =والعنقرا ما تطيح الا على عنقرا
طلاب نار الظفر ياطى مشب الرماد =هباب ريح نهار البيع والمشترى
والا ردي الروابع دم قلبه جماد =كفه على كسب ناموس الفخر ماضرا
خطو المشبب عزيز يفوح راسه عناد =ما يكتسي بالمذله لو يعيش بعرى

السلام عليكم ..
أخوي أبن نعيس لك جزيل الشكر على اختيارك لقصيدة ابن عمي : عبدالله الغزي و اعجابك بها , و هذا يدل على شاعريتك و حسن تذوقك للجزل من القصيد ..
لكن - و اعتبر ما اقول عتب محب - ليتك ذيلت القصيدة بأسم الشاعر لأن غالبية القراء يقرأون الموضوع ولا يقرأون الردود . و أسم الشاعر لم يذكر إلا في الردود .
أحسب أنه النسيان , و إلا مثل هذا الأمر لا يغيب عن فطنتك ..

الأمر الآخر .. هذا البيت :

الكل جرح دوى.. والكـل جـرح ضمـاد === الا الكرامة تموت وجرحهـا مـا نبـرى

فيه خطأ في الكلمة الأخيرة ( ما نبرى ) ,, و الكلمة الصحيحة هي ( ما برى ) و عليه فيصبح البيت :

الكل جرح دوى.. والكـل جـرح ضمـاد === الا الكرامة تموت وجرحهـا مـا برى

أكرر شكري على انتقائك الجميل ,, و الشكر مرة ثالثة على رحابة الصدر ..

تحياتي للجميع