يا سلام الله بردة للحضور وللإدارة= السلام اللي يجيب الخير وأسباب الوناسة
عقبها يا ربعي العتبان مضمون العبارة= تاتجي لا شفت شاعر امتمرس بالمراسة

مرحـبا ترحيـب وافـي ماتغيـَر عن قـراره = يجلب الخير الكثير بحسنْ تدبير وفراسه
اللبيب مْن العرب يحضر ويفهم بالأشاره = والشعر وهبه يطوَر بالتجارب والدراسه

البقا يا الشاعر اللي ينعرف حسب الأمارة= كل رجلٍ يا عميل الخير معمول لباسه
كثروا أصحاب الرياسة والسبب شغل الوزارة= لكن أنته ويش وضعك في نظر أهل السياسه

القمر يامعدي المرقاب يبقا في مداره = والرجل طيبه ياراع الأوَله من طيب ساسه
كل واحد يطـمع بدنـياه ويـرد أعتبـاره = صاحبك يمشي نهار الواجبه مرفوع راسه

بين بكر وبين تغلب صرت أشوف اليوم ثاره= الحسد قام ايتبين لي بعد شفت النحاسه
مير يبقى التغلبي معروف قدره مع وقاره= ما يخالف لا لقى الواجب ولا حب الدساسه

كـلنـا نـدري بريـح النـار مقبـسـها شـراره = لـو تـشـب النار ماتـنـفع حـشـود ولا حـراسـه
وأطيب الفرَيس ينظر في يمينه من يساره = لارما الشلفا على خصمه يطير من الحماسه

مـن بـنى بـيـت المعـزَه مـحـدٍ يـهـدم جـداره = وأن لقاله دابٍ أسود يمترح صكَه وداسه
من مشى درب المراجل مايدوَر درب غاره = مايـدوَر للـقصور ولا يجـي فـيه أنـتـكاسه

كل شخصٍ ما ضرى في شب معواد المناره= رحمة الله فوق راسه ثم نعزي فيه ناسه
من مشى درب العدالة ما يشابه للحياره= وأنت شوف اللي يباها تشتعل راع البلاسه