ياليل عيني تفك النوم وتخمه=سرت ورى هاجسي ساعه ورى ساعه
كنها تنادي تقول الهمه الهمه=ورجلي على صوتها للدرب بتاعه
كل الطواري على طاريه ملتمه=تلف وتدور وتعود على اوجاعه
لو احسب الوقت في كيفه وفي كمه =الماضي اللي معه نتيجته ضاعه
بس البلى يوم روح تاركٍ همه=خلاني انحاس في حسنه وفاطباعه
الشين طبعه لكنه فالحسن قمه= من شاف حسنه يقول الطاعه الطاعه
هو سيد الحسن هو جده وهو عمه=تجمع الحسن فيه بكامل انواعه
يقدر يشتت بلد بيديه ويلمه= ويقدر يضيع بشر لو يشر اصباعه
لاعاد ليلٍ مشت بي خطوتي يمه =ولا عاد عودٍ صدفت وضاع مركاعه
جاني بليلٍ ظلام ويشتكي غمه =صعبٍ عليه الطريق وصعب مقطاعه
يشكي ظروفه علي وجيت مزتمه=قلت آخذ اجره واثر دنياي خداعه
تقتادني في ظلام الليل للجمه =تسوقني والسنين الغبر قطاعه
وقدام لا ادق باب البيت واهمه=فكت لي الباب صدفه مثل ولاعه
وصاحت تنادي بعال الصوت يايمه=وتبنجت واقفه ترجف ومرتاعه
وحاولت اجمع شتات القلب والمه=واضغط بكفي على محل سولاعه
قلبٍ توقف بعدها جامدٍ دمه=تلخبطت كل دقاته واوضاعه
والله والله دينٍ يبري الذمه=احلف وانا ذمتي ماهي بياعه
اني بعدها غريق البحر في يمه =يائس بحلم النجاه وماتت اطماعه
من جرحها اللي يهد الحيل ويسمه=اقبل على الموت والسبه من اوجاعه
وان مت منها ولو تبغونها ذمه=اصل السبب عودها اللي ضاع مركاعه