الهيـــــــــــــلا *** منتدى قبيلة عتيبة

الهيـــــــــــــلا *** منتدى قبيلة عتيبة (http://www.otaibah.net/m/index.php)
-   شعر المحاورة (http://www.otaibah.net/m/forumdisplay.php?f=52)
-   -   الشتاء .. والصيف (http://www.otaibah.net/m/showthread.php?t=16887)

فيصل الثبيتي 26-Oct-2005 10:31 PM
الشتاء .. والصيف
 
السلاام عليكم ورحمة الله وبركاته ...

بدون مقدمات .. بسم الله الرحمن نبدأ ...


الشعر مثل دمّ الروح ما نقدر نهدّه=لو زعلنا منه جانا بالرضى من بوح سدّه
وان زعل ولد الهجوس انقدّم الحبّه لـ خدّه=والشتاء والصيف عنوان الفصول الاربعة


في محل الرجال اللي تلم الهجوس=مرحبا من هجوس ٍ باح مكنونها
ودنا ناخذ دروس ٍ ونعطي دروس=طيبات القصايد من يغنونها ؟؟


شيلو البيت يا صفوف

ذياب 26-Oct-2005 11:17 PM
الشعر و أسمه شعر والقلم وأسمه قلم=والمواقف للرجال اللي يرزون العلم
مير لا تدعس برجلينك على شوك السلم= الشتاء والصيف عنوان الفصول الاربعه




البقا في محل الروس والروس روس =وعز روس العرب من مكسب أمتونها
كان تبغا الدروس أنشد جميع العسوس=عن جميع الديار اللي يمرونها

ماجد الهذلي 27-Oct-2005 12:10 AM
متااابع

لحقناكم من البدايه

نتابع القاف

وأنا في الصفين مره هنا ومره هنااااا

تحيااااتي

((الدلبحي)) 27-Oct-2005 12:18 AM
فيصل

صح السانك ومن طول الغيبات جاب الغنايم

انا معك فالصف والربع حاضرين والصفوف حاميه

ذياب

صح السانك ومتابعين لكم

تحياااااااااااااااااااااااااااااتي

فيصل المسعودي 27-Oct-2005 01:57 AM
فيصل الثبيتي


ماشاءالله عليك انت تغيب


ثم تطل بكل ماهو مبدع وجديد


هلابك يالغالي


سجلني في صفك يالسمي


ذياب صح لسانك



يالغالي


ووواصلوووااااااا


يالغالين


متابعين لكم


تحياتي

الايداء1 27-Oct-2005 03:32 AM
,
,
صحت

السنتكم

يالشعار والليله الطاروق غير

بين فيصل وذياب . متابعين يالمبدعين .

فيصل الثبيتي 28-Oct-2005 02:46 AM
هلا بك يا ذياب ...


خلووووووووووووووووووووها


الله اكبر ما لقيت امن الخواطر شي يكفي= لو اصفّي لك جميل الحرف ما اظن يصفي
مير عرفنا على نورك .. ترا النور مخفي=والشتاء والصيف عنوان الفصول الاربعة



كل روس العرب ما تنشرى بالفلوس=ليت والله ذياب يعرف قانونها
لو منتب هنا صرنا نحوس وندوس=لكن اقرب وغن اللي تغنونها

فيصل الثبيتي 28-Oct-2005 02:48 AM
لي عودة .. للرد على اساتذتي ...

مرزوق حمدان العتيبي 28-Oct-2005 10:49 AM
...
.

فيصل الثبيتي الحمد لله على السلامه..
من طول الغيبات جايب الغنايم ....
صح لسانك ولسان ذياب واصلوااااااا.

ذياب 28-Oct-2005 10:14 PM
يبرق البارق وجاك الخير والخير أنهمل=فالضحى والنور واضح يالثبيتي مكتمل
مير كبرنا الحموله وأكسرت ضهر الجمل=الشتاء والصيف من ضمن الفصول الاربعه





كل روس العرب من فوقها حد موس=لو تزل الحدود اللي يعرفونها
يالثبيتي قريب دوس ولا ندوس =مير تبغا نهديها تهدونها

فيصل الثبيتي 29-Oct-2005 03:19 AM
الله الله .. استلم يا غالي /

خلوووووووووووووووووووووووها


فيه نور ٍ جنب ضلع وفيه نور ٍ فوق قمّه=مير هرجك لا يجيب إلك البليّه والمطمّه
والجمل ما ضاق صدره من صياح ومن مذمّه=والشتاء والصيف عنوان الفصول الاربعة



به رجال ٍ وقوف .. وبه رجال ٍ جلوس=وانت تعرف سيوف ٍ جتك من دونها
كب عنك الكلام اللي يسر المجوس=لا تخل العوارف تكشر سنونها

فيصل الثبيتي 29-Oct-2005 03:25 AM
ماجد الهذلي ..

الله لا يهينك يا غالي على تواجدك

ومتابعتك تسر الجميع ...


الدلبحي

مرحبا بك يا مشرفنا الغالي

الله يبيض وجهك .. ودامك معنا

حنا في نور ان شاء الله



فيصل المسعودي

مرحبا يا غالي ...

والله انك سريت خاطري بتواجدك

خلك معنا يا ابن العم



الايداء

هلا والله يا ابو تركي

نورك زاد النور نور يا بعد حالي



مديرنا مرزوق

يا هلا والله ومسهلا بك

خلك معنا ولا تحرمنا تعليقاتك يا ذيب




فيصل الثبيتي

ذياب 29-Oct-2005 10:38 PM
الجمل جاه الجمل والجمل جاه البلا= يوم شاف شعيل يزبد فك رجله للخلا
ليش ياسمحان تهرب نص ذودك فالفلا= الشتاء والصيف من ضمن الفصول الاربعه




والله أو نعم بالريجيل والعلم قوس= مانعم الرجال اللي تعمونها
للبعارين يافيصل بعيد الرموس= كيف تكشف غطا الدعوى ومضمونها

فيصل الثبيتي 30-Oct-2005 01:04 PM
يالبعير شعيل لا يظهر زبدك وتحتمي=والله اني بس اسولف لك واضاحك مبسمي
وانت عندي .. كيف انا ضيّعت ذودي واغنمي؟!=والشتاء والصيف عنوان الفصول الاربعة


انت راع القدوع اللي تضر الضروس=سوسة ٍ ضاق صدر اللي يذوقونها
انت جبت المهر واحنا نجيب العروس=والديار الرديّه لا تزورونها

ذياب 30-Oct-2005 09:20 PM
ساحة الميدان مافي جوفها حبت خشم=لو ماقلت لك حاظر لو ماقلت لك سم
كل شي يصير مار بعير مايرعى غنم=الشتاء والصيف عنوان الفصول الاربعه





وأنت راع الركيب اللي زروعه يبوس=ماتعدل زروعه لو يساقونها
فيه علمن خفي وفيه علم محسوس=بيننا مير بعض الناس يفشونها

الايداء1 30-Oct-2005 11:14 PM
فيصل
انت راع القدوع اللي تضر الضروس=سوسة ٍ ضاق صدر اللي يذوقونهـا
انت جبت المهر واحنا نجيب العروس=والديـار الـرديّـه لا تزورونـهـا

ذياب

وأنت راع الركيب اللي زروعه يبوس=ماتعـدل زروعـه لـو يساقونـهـا
فيه علمن خفي وفيه علم محسـوس=بيننا مير بعـض النـاس يفشونهـا

صحت السنتكم

يالشعار الصفوف عامره بوجودكم

وتستاهل ياذياب لقب شاعر

ذياب 30-Oct-2005 11:59 PM
يامرحبا يالايداء1


الملعبه ماتحلا الا بتواجدك




فلا تحرمنا حضورك




اخووووووووك ذياب

فيصل الثبيتي 31-Oct-2005 01:18 PM
ساحة الميدان ما في جوفها ليتك وليتي=ماني عندك وسط بيتك وانت منتب وسط بيتي
مار هوّنها قبل لا تحرقك نار الثبيتي=والشتاء والصيف عنوان الفصول الاربعة



ليه تختار شي ٍ ما اكسرته الفنوس=صلب صامد لو الحجّة يعرضونها
في بحور المعاني ملّ قاع الغطوس !=اكشفوها وفوق الناس يرمونها

فيصل الثبيتي 31-Oct-2005 01:21 PM
مشرفنا الايداء

بحضورك ازدانت الصفحة

الله لا يهينك يا غالي

فيصل

فيصل الثبيتي 31-Oct-2005 01:24 PM
مبروووك يا ذياب لقب ( شاعر )

كفو يالغالي .. تستاهل اكثر من هاللقب

واصل الله لا يهينك ...

فراج القرقاح 31-Oct-2005 01:30 PM
.....

سلام عليكم

صحة السنتكم ياشعاااااااااار


لاهنتوا على المحراف الطيب


واصلووووووا يالنشاما وانا في صف ذياب ضدك يافيصل لحاجة ٍ في خاطري|1|

ذياب 31-Oct-2005 10:22 PM
سلمت يافيصل وبارك الله فيك واستلم


-------------------------------------------------------------------------


من هجوس الشاعر اللي يبدع القيفانيه=عيب والله يالثبيتي طردت الظيفانيه
لوتشب النار كسرنا الظلوع الحانيه=الشتاء والصيف عنوان الفصول الاربعه




أدخل المدرسه وأعطيك رقم الجلوس= والمدرس عصاته ما تدانونها
فيه ناسن تعرف العلم وأخرى تيوس=لو كشفنا الدعاوي ما يجيبونها

ذياب 31-Oct-2005 10:26 PM
اقتباس:
المشاركة الأصلية كتبت بواسطة الداهيه
.....

سلام عليكم

صحة السنتكم ياشعاااااااااار


لاهنتوا على المحراف الطيب


واصلووووووا يالنشاما وانا في صف ذياب ضدك يافيصل لحاجة ٍ في خاطري|1|





حياك يالداهيه حياك

((الدلبحي)) 01-Nov-2005 04:41 PM
الله الله

واصلوا يالربع ترى الصفوف حاضره والجماهير يصوتون



تحيااااااااااااااااااااااااااااااااااااااتي

فيصل الثبيتي 01-Nov-2005 11:53 PM
سالم يا ذياب /

يوم بعض الناس قلّط له وراعين النهابه=مجلسي يا ابن العرب : ما يدخله غار الذيابه
لا تهرج فالمراجل وانت عيبك فك بابه !=والشتاء والصيف عنوان الفصول الاربعة


المدرس بليد وفيه بعض اللحوس=هامته بالعصاه انخزق عيونها
منتدانا به رجال ٍ رفيعة نفوس=وان بغيت التيوس تعرف مجنونها

فيصل الثبيتي 01-Nov-2005 11:56 PM
مرحبا يا ابو فلاح

الله يخارجنا منك ومن ضدّك

نوّرت يا ذيبان . . .

فيصل

ذياب 02-Nov-2005 12:50 AM
الله الله

----------------------------------------------


أرفعوها ياعتيبه وأرفعوا نيشانها=هرجنا هرج الرجال اللي رفيعن شانها
فكت البيبان للورعان مع ورعانها=فالشتاء والصيف وأنواع الفصول الاربعه



المدرس مع الطالب يدوس ويحوس=غايته يالثبيتي وش تسمونها
يالثبيتي ترانا مانحب البسوس=والبساسه عتيبه مايحبونها

ابو بروق 02-Nov-2005 01:00 AM
الله الله ياشعارنا صحت السنتكم ..زيدوها هيل
معكم جمهور متابع

فيصل الثبيتي 03-Nov-2005 07:54 PM
والله إنّا فوق روس الناس نمشي وانتفاخر=ما تسمّعنا هروج الورع لو كان شاعر
وانت خاسر منت رابح .. وانت مسلم منت كافر !!=والفرح والعيد عنوان الفصول الاربعة



وقـّف الموتر اللي غربلته التروس=المواتر مشيتو كل طبلونها !!



وكل عام وانت بخير يا ذياب .. والسموحة ان جا فالخاطر شي ...

وإلى لقاء آخر ان شاء الله .. اخوك فيصل الثبيتي

فيصل الثبيتي 03-Nov-2005 07:57 PM
يا هلا والله يا ابو بروق

صح بدنك عني وعن اخوي ذياب

وتستاهل البن والهيل طال عمرك

تابعنا في لقاء آخر ...

فيصل

ذياب 03-Nov-2005 09:33 PM


الساعة الآن »05:26 AM.

 Arabization iraq chooses life
Powered by vBulletin® Version 3.8.2
.Copyright ©2000 - 2025, Jelsoft Enterprises Ltd