بسم الله الرحمن الرحيم


السلام عليكم ورحمة الله وبركاته



الأخوة الأعزاء أعضاء ومتصفحي منتدي قبيلة عتبية الهيلا اعتذر لكم عن الانقطاع في الفترة السابقة تعرفون اجازة ورحنا نتبع الصيف مثل مايقولون المهم اني رجعت لكم وفي جعبتي الكثير والكثير واليوم حبيت اشارك بقصيدة من روائع الشاعر / ملفي المورقي ذاك الصرح الكبير وهي قصيدة مدح في قبيلة عتيبة ويقول ابو وافي

مادام كلاً قام يمدح قبيلته = ويذكر مناسبها ويذكر فعولها
اللي الفخر في مدح ربعي عتيبة = اللي تسلسل من هوازن أصولها
ربعي هل التاريخ والعز والفخر = ليا من دقت للحرايب طبولها
إلها إسمها الرنان مع ساير العرب = إليا ضيقت بعض العرب صوتولها
مثل الجبال الشامخة فالجزيرة = مترامية عرض الجزيرة وطولها
من قو هيبتهم ومن قو باسهم = كل الديار اللي يبون وصلولها
إليا ساقوا العطفه وسارت جموعهم = الأرض ترجف من حوافر خيولها
تمشي برغبتها وتمشي بكيفها = ما كن ابه ناسً من الناس حولها
لين إنها وسط الجزيرة تمركزت = وشرت على أطراف الجزيرة نزولها
هيلاً على ماقيل الاول مهيله = تطول رغبتها ولا أحدً يطولها
بحدب السيوف اللي تجاذب قنيبها = وشلفً عريضات وساعً دحولها
ما تأكل الا كل شيخً مجرب = تخلي عن الخيل الأصايل حمولها
يوم أنهم هاك الليالي تحدروا = مثل المزون اليل تدلت ثعولها
بروقها بيض السيوف الرهايف = ورعودها العزوه ليا ضاق جولها
وثعولها البارود عند انصبابه = والدم من فعل النشاما سيولها
هذا وأنا ملفي فعايل عتيبة = ليا من جات المعضلات إرتكولها
ومن لاذ بحماهم من الخوف يامن = تضفي عليه عن البلاوي سدولها
يصير في عيطىً قوي حجاها = تحجي وتذري من دخل في كفولها
من طيبها ينسب لها عدة أسمى = اسمىً دواليت الدهر ما تزولها
ذكرت منها البعض والبعض الاخر = ما اوفي حروف رسالتي لين اقولها
ذباحة الحايل ولطامة العدا = حتى نعاتيت الطغاه اشهدولها
قدم العدا نار قوي جحيمها = وقدام وجه الضيف زين قبولها
ابوابهم طول الليالي مشرعه = ما حلجوا قدم المسير قفولها
ان جاهم الطرقي لقى العود والشبب = ودلال رسلانً تعاقب بدولها
يكيف الضرمان خنة عبيرها = أهل الكرم والمكرمات اتعبولها
وكل السلوم الطيبة من سلومهم = اسلومهم سارت ونالت قبولها
كم أصلحوا من مشكلة غير الأخرى = الصلح من بين القبايل ميولها
ربعي سراج الدين في ظلمة الجهل = ما تمشي الا ما مشابه رسولها
قلته وأنا شاعر وامجد قبيلتي = اللي من الحكمه ثقال عقولها
والشاعر اللي مايمجد قبيلته = ياعنك ماثمن مساعً سعولها
همه ليا غنى القصيد لمصالحه = ياكل به العيشه ويعرف دخولها
في مدح ربعه ماتدرهم قصايده = وفي غيرهم محفً سماري ذلولها
مايدري الدنيا رحىً مستديره = يمكن عليه تدور ماحال حولها
وأختامها مني صلاة على النبي = شفيع الأمه يوم يزداد هولها

وسلمتكم

ماجد الهذلي

يامرحبا ولك كل الشكر على مرورك الكريم وتسلم والله لايهينك

@المورقي@


يامرحبا ومسهلا بمرورك الكريم والله لايهينك وصح بدنك

الايداء 1


ياهلا ويامرحبا بك اعداد مالبى وطاف .. وتشكر يالغالي على مرورك الكريم ومرورك لمشاركاتي بحد ذاته فخر واعتزاز لي يعلم الله كم ارتاح واستانس لاشفت اسمك والا شفت مشاركاتك والله لايهينك وصح بدنك

ع المورقي

فيصل المسعودي

ابو زيد الثبيتي

هيكل

لكم كل الشكر والتقدير على هذا المرور الكريم . واعتذر لكم عن الانقطاع بسبب الانشعال بهالدنيا الله يكفينا شره

مشاري الروقي

ياهلا والله ويامرحبا ويامسهلا القلب فتحت لك الابواب ولك كل الشكر والتقدير على مرورك الكريم وتعقيبك على ماكتبت هو بحد ذاته شرف لي بل فخر واعتزاز.. تسلم والله لايهينك

ابو عبدالرحمن
ديب الحنابج
صويب الرمش



لكم كل الشكر والتقدير على مروركم الكريم والله لايهينكم

أخي / فيصل الشفيعي

لك كل الشكر والتقدير على مرورك والله لايهينك . واما بالنسبة للقصيدة فهي كما قائلها الشاعر / ملفي المورقي وأنا ما خذها من لسان ملفي المورقي ....