غابت نجوم السماء غير الاخيرة = قمت اودعها واحملها وصايا
بالمشاعر والتحيات الكثيرة = عد نجم الليل واعداد البرايا
الك ياللي ماسكن بالقلب غيره = ناصب(ن) لك مملكة بين الحنايا
ابتعدنا كل منا راح ديرة = طالت الايام وعروقي ضمايا
كل ماقلنا عسى بالامر خيرة = لو بقا للحب في قلبي بقايا
نعمة النسيان ياعيوني كبيرة = والعوض فيهم بترفات الصبايا
اعترض لي بالهوى طفلة صغيرة = طفلة(ن) فيها من الغالي تهايا
جددت بالقلب طعنات(ن) شطيرة = وحارت اقدامي ونوخت المطايا
طحت مثل اللي غدت رجله كسيرة = طاح بالميدان بنحور السبايا
في نهار(ن) يحمس الارض بهجيرة = قام ينخا عزوته ياهل الحمايا
عودوا له وانتهت كل الذخيرة = وصارت الارواح من دونه هدايا
والهوى كم بالهوى قصة شهيرة = باقية واصحابها راحوا ضحايا
ولو فديته بالطويلة والقصيرة = ماعليه لوم في عذب السجايا
عنق ريم(ن) بالفيافي مستذيرة = في فياض(ن) ماوطت فيها الرعايا