يالداهيه خل السوالف تستدير = لن كان تقدر فالطلوع وفالنزول
والحب لو هو صم تطحنه الرحاه = واللي عقد رؤس الحبال يحلها
لن كان تدري بالصغير وبالكبير = أحسب حسابك يا ولد سقنا الذلول
والخط بين للفهيم أليا قراه = واللي عقد رؤس الحبال يحلها

الداهيه حاضر واليا جاك النذير=ماعاد فيها يالسنافي وش اقول
والموت وان جاكم ترا مابه غناه=اللي عقد روس الحبال يحلها
حنا حسبناها على الشي الخطير=ماهمنا جمع الرجاجيل الفحول
والعاقل اللي يعتبر مما لقاه=واللي عقد روس الحبال يحلها

يالداهيه منته طويل ولا قصير = شكلك سواة الحبحبه عرض ٍ وطول
والبزر فيها كبر تمر بلا نواه = واللي عقد رؤس الحبال يحلها
حنا نسوق الزمل ونسوق البعير = والناقه اللي فوقها ذيك الحمول
والغافل تخمه يديني من قفاه = واللي عقد رؤس الحبال يحلها

يامرعب الشعار يالخبل العوير=حاذر على نفسك لا يجيها الجفول
والبزر جاته لقمة ٍ سدت جماه=اللي عقد روس الحبال يحلها
انتم تسوقونها وبليا شوير=وتسوقها مدري تطول اولا تطول
والبايره ما احد ٍ يوبع في خطاه =اللي عقد روس الحبال يحلها

يالداهيه منته بداري وش يصير = يا حبحب السكين جينا بالحلول
يا مبتلي منته بلاقي لك نجاه = واللي عقد رؤس الحبال يحلها
حلال لو نذبحك يا طير ٍ تطير = ما تعرف أوزان البيوت ولا تنول
أنته سواة اللي يسمونه جحاه = واللي عقد رؤس الحبال يحلها

يامرعب الشعار فالامر الاخير=منته معين من ورا حكيك قبول
يالعين اللي ماارّوت الناس الضماه=واللي عقد روس الحبال يحلها
منته بكفو تقابل السيف الشطير=خل الزحول تقابل رجال ٍ زحول
وانته كما اللي شايل ٍ داه برداه=اللي عقد روس الحبال يحلها