تدور المعاني بين حبك التماثيل = هلابك علي وضح النقا يابن مرة
انا اقول مابك زود من عرض ماقيل =ولكن نبا نعطيك علم وتصرة

هلا بك على حدب السيوف المصاقيل=معاني نقصقصها كما قص جره
انا افوز يا الفوزان لا طول الليل=تفضل وعلمك لاتنقصه ذره

ليا جات بالوقفات مانرخص الكيل = وملح المقمع في عيونك نذرة
نجاريك بالالحان حيث انك حليل = وتسبدك علي مر الصواديف حرة

مواقيفنا تبري الكبود المغاليل=يا كم فارس ٍ من فعلنا الجيب طره
تفاخر ولا شفنا لوسمك مداهيل=ولا يجحد اصله غير بياع صره

ونعمين مير الهرج مايعدل الميل = وصوتك علي روس المشاريف جرة
انا من هوازن نجد يامردي الحيل = ووسمي علي غاربك بالختم اقرة

اي والله نعم لامن ركبنا على الخيل=نطقها الزمن قبلك وبحره وبره
يانجد المسمى غربلتك الغرابيل=يجي كل ليله من نسب لك مقره

لابالله جاك السيل ياناطح السيل = يبا يقلعك من ريعك اللي تمرة
عتيبي علي دين الرجال المشاكيل = ماهو مثل من دان الخنا والمعرة

ياخالد ترى ماكل من يعدل الميل=يبا يصيبها في كل مره ومره
توقع ترى فوقك تخيل مخاييل=بردها على راسك يجيب المضره

تريح ودوك البن والتمر والهيل = ولايلحقك شكٍ علي حين غرّة
تعزوي ولكن ماحصلك محاصيل = ولو تبترم وتلف عشرين كرة

بعد فاتك الموجز وكل التفاصيل=خذينا دررها مابقى معك دره
بشهد عليك اللي يعرف التحاليل=بعد نمت قوم ومفرق الثوب طره

علي الهون ياراع الدلال المعاميل = وعمك تري حقّ عليك ان تبرّة
تري قافك اللي شيبتة البهاذيل =وراجع وتلقي وانتبة للتشرّة

علامك على المطلاع ماعاد بك حيل=دركسون موترك انفرط لا تفره
نقول لك صب وتعتذر بالفناجيل=ترى البخل حاجه ماوراها مسره

ليا كنت عندي من حساب البهاليل = ياكيف اتجمل واحدٍ فية عرّة
تري حن علاكم مثل مايطلع سهيل = وصعبة علاكم تاصلون المجرّة