سلام والمبدا سلام ولا نقول الا السلام = ورحمة الله وبّركاته خير ما نبدا بها
يا منتدا الهيلا نصبت بداركم بعض الخيام = بعض الخيام اللي على البيدا ضربت اطنابها

يا مرحبا والمحترم يلقى من الناس احترام=ياسعد عين اللي عرف جزل العلوم وجابها
ما دام ماهي قصرٍ يناطح مراويح الغمام=خطرٍ تطيّرها هبوب الصيف في مهبابها

دام البقا والشعر يالشاعر تفاهم وانسجام = ما هو نحوسٍ تهتبد ليقربها حلّابها
الصدق مثل النور ساطع بين طيّات الظلام = الميد بيّن والخيول الجمح من ركابها

علّم بها اللي ياخذون الشعر من دون اهتمام=وانته وانا ندري عن السلعه وعن جلابها
حنا بلشنا بالطيور اللي على راس العدام=من كثرها ما عاد نعرف صقرها وغرابها

ما لك ومال الكلمه اللي لا حلال ولا حرام = خلها وشم عنها وهي ترجع على كتّابها
سعر الذهب غالي ووزنه بالقراط وبالجرام = بعيد عن فقران الأيدي لو تزيد حسابها

انته تعاتبني وانا مااخطيت عن درب النظام=لكن وش تسوّي مع الجهال لو تبلابها
راع الجمل ما يلزمه لاافلت يديه من الخطام=دام الرعيه هامله , رعيانها وش صابها

ترا الجمل يخطم وخشم الثور يلجم باللجام = يا راعي الفلّه علامك ما تسكّر بابها
التنتنه جت بالبكا والطق فكّاك اللحام = والله يكرّم لحيةٍ طالت بظل أشنابها

وشلون اسكّرها وحنا ما وصلنا للختام=الواجب تحل القضيه لا عرفت اسبابها
اما تبينا كلنا ندخل مع باب السلام=والا نرد الهيّنه لا جت بروس اصحابها

البرق يبرق فاليمن لا تحسب ان البرق شام = والسيل جاك من الجبال اللي تفيض شعابها
ركّز معي والملعبه بنتٍ تدور للغرام = ما هي بكوره تدّرج ليشاتها لعّابها

في دار يام ولاتبي احدن يدري انك فدار يام=لكن ما ضاعت حقوق جالها طلابها
كلمتك هذي ياعلي ياصاحبي ,, فيها كلام=وش لون تنكر دلة الرسلان يا شرابها

يا غامدي درهم مادامك معتلٍ ظهر السنام = حتى تصفّق لك جماهيرٍ كسبت إعجابها
ماني بلايم صاحبي ولا يلحقني ملام = شب المناره شبها والنار من شبابها