بغيتها في سعود و عوّدت في عمير=يا الله تخرج لنا المجني من الجانيه
اشوف سلك القطن غطّاه سلك الحرير=و المشكله كلها تصنيع تايوانيه

بغيتها في سعود وعودت لي بخير = اورد على عدنا وشرب يا ضميانيه
خل الرحى ياعلي في يدنا تستدير = ونلحق الاوله ياهية بالثانيه

الحمد لله و الّا العدّ تحت الغدير=مخصوص لثبيت كان اثبيت عتبانيه
ما تستوي يا الثبيتي جنّه و زمهرير=الّا مع اللي ضعيف إخلاص و إيمانيه

ياكبر حلمك لكنه في نظراً صغير = احلم بحلمك هذه فى بلاد شهرانيه
منته برب العباد اللي يدير المصير = خلقك بشانك وخلق الله على شانيه

بسم الله المعتلي معطي الغني و الفقير=اسمٍ معانيه تدحر كل شيطانيه
يا عمير طاحت عزوم أهْل البقر و الحمير=و الله يستر على أهْل الإبْل و الضانيه

ياقشر حظي كما بوزيد فيده خضير = وش حيلتي دام حظي جاىء تعبانيه
ماني خشير ك با لأولى يا عساك الحضير = والثانيه لاهلها مانته لها عانيه

لا صار مالك بصر يبصرك دوّر بصير=يبصّرك كيف طاحت مكرة السانيه
يطيح راس الصغير ان طاح راس الكبير=قولٍ سمعته على مدّات الازمانيه

يا سرع ماجيتنا لاجىء سوات البدير = ويصير غير البدير اليوم بدرانيه
البيت ساسه حجر ماهو بطنب وخدير = اموثقينه على توثيق جدانيه

افهم كلام الفرزدق و احفظه يا جرير=الاندلس للعرب ماهي للأسبانيه
و الله و نعمٍ بكم لا صاح صوت النذير=لكن ما فيه نارٍ دون دخّانيه