ابا العب مع سفير ثبيت ساعة والزعل مرفوع = بعد مابان مفعول الوساطه معْه .. ابا اقعدله !!
بعد ماكانت احلامه من أول مثل حبّ الكوع = تحقق جلّها هالحين .. والاوضاع معتدله !!

على الله ياعميل ٍ عجل وده ينهي المشروع=يحسب اني سواته كل رجال يتودد له
انا ماني كما اللي كل همه بشت لو مرقوع=اعرف الوقت الاقشر فالليالي ميله وعدله

على الله يافريد الطبع مدري يافريد النوع = سواتك معجزاته واجده لاجيت اعدّدله
تقوله وانت من عامين سايب في زمان الجوع = لبست البشت الاصفر من بعد ماكنت بالبدله !!

قليل المعرفه ماله مع اهل المعرفه منفوع=ثمان سنين يسعى مالقى رجال يشهدله
تلبسني فعولي واسمي اللي بالذهب مطبوع=وبعض الناس حافي رجل والاذنين منهدله

رفيقك ذيب وأصوك راس .. لكن الرجا مقطوع = تحدّه عزته فالوقت يكنا ضيمه ويدله
طغى كِبرك على عقلك وغطى قلبك المطبوع = ترا هالطبع طبع اهل المداين لاتعوّد له

انا ماقول فيك قصور ياطامع ويامطموع=ولكن ياعميل الخير قللي , وش تهدد له؟
تعرف الصدق لكنك يحدك قلبك الموجوع=تتابع في رفيقك كل ليله واترّصد له

انا ابنشدك يوم انه عطى من ضغط ولاطوع ؟؟ = انا اعرفه مايعطي غير مسكين يتردّدله
لك الله ماعليّ خلاف زال انّ الأمل مزروع = وكلِ يبذل المجهود لين الجهد يحصد له

عتيبه يعرفون اللي علمهم فاللقا مرفوع=مادام اعطوك "شاعر" فاشكر الله وتحمّد له