ياهل المزاين والبكار المزايين =زدتوا وقربتوا علينا القيامة
الناقة تباع بثلاثة ملايين =وبعير تشرونه بوزن سنامه
هذا طغا والا تبدوي مجانين =وبني بليا ساس عجلٍ هدامه
وفي هالزمن شفنا لنا ناس طاغين =لو قلت ماضيهم لحقني ملامه
ابو قرن واحد تعدى ابو قرنين =احدن سرى واحد ٍ بقا في منامه
ولدغ العقارب غير سم الثعابين =والفاتنة حطت على الخد شامه
وتضحك وتغمز عينها للغبيين =تبغى الغراب يعشق بنت الحمامه
والله يكون بعونكم يالمساكين =ترحموا لاهل تربه والرغامه
واللي خدم واللي تقاعد هكا الحين =قالوا بعد جازوا منه بالسلامه
اطيبهم اللي في مراحه ثلاثين =على طريق رماح والا الثمامه
وازرى يعلفها ولاله معاوين =يوماً بجرف ويوم له في عدامه
وجاره حسن يقول شف جاري حسين =امسى واصبح مشتر ٍ له جهامه
جهامةٍ معها سكوس وصوالين =ومرافقين وناس تبني خيامه
واللي تعزوا واحتزم بام روحين =لينه حفر للقبر تسعين قامه
وبعض الرجال اسما بليا عناوين =تمرجلوا باللي عليها علامه
ولالومهم حاديهم الفقر والدين =ولا يستر العريان ثوب الرخامه
ويمكن ليا تابوا وحجوا ملبين =الله غفور لمن يبا الاستقامه
يوم الضعيف مثل مصطلية العين =والا العجوز اللي عليها اللثامة
ولاتنشد الرجال دنياه من وين =الله عطاه ولاتفتش حرامه
ان كان يستاهل فزين ٍ على زين =مراجل الرجال ترفع مقامه
والا الردي لو يملك حساب بنكين =نعامة ٍ تمسي وتصبح نعامه
المال اعز رجال كانوا بسيطين =اليوم شوخ وفي لقبهم فخامه
وبعض الرجال اللي من اول مسمين =راحوا مراح مقاط مدري علامه
والهجن ترثع بالنشاما حراذين =وراع الشداد خلاف راع المسامه
والحضر جونا مغلقين الدكاكين =كل يقول البل هواه وغرامه
جو يشترون البل نشاط وقويين =مثل المهيلب حط جل اهتمامه
واهل القصيم من القدايم فراعين =عقيل بالشام ولهم بالمنامه
واللي بحوشه ثور والا بقرتين =ويزرع ومن زرعه يسوي طعامه
طقت براسه يشتري له بعارين =وراع الدراهم ماتراقل عظامه
وعسى على القوة لجونا متحدين =الحضر واهل الضين واهل تهامه
وبالوضح فالنخبه بقينا لنا سنين =وبالملح لبسنا البعير وسامه
والامن بالله ثم بحكم السلاطين =والعاهل اللي وسط قصر اليمامه
العاهل اللي سيرته نصرة الدين =في سيرته في حنكته في نظامه
عينه على شعبه وفالعسر واللين =معهم وفيهم نظرته وابتسامه
واخوانه عضوده من يسار ويمين =والشعب من حوله وخلفه وامامه
ويالله ياقابل صلاة المصلين =اغفر لنا والعمر زين ختامه

صح بدنك والله لا يهينك على المرور الكريم ..


تحياتي لك ..

صح بدنك و دآم عزك وشآكرين مرورك الكريم

صح بدنك والعفو (( القصيدة الرائعه يجب علينا أيرادها ))

صحيح أخوي زعيم المراجل وأشكرك على التعليق ، وعلى المرور المتوآضع

صح بدنك والشاعر / عيد بن حطاب شاعر لا يختلف عليه أثناان

صح بدنك أبن مكرز

صحيح هو بعيد عن العلام والسبب كثرت أشغاله ومع معزبه الوليد بن طلال

وابو سعود شاعر أجتماعي وشاعرة محاورة سبق له وأن لعب مع شعراء عمالقه بأمثال أحمد الناصر

وأن شاء الله ماننعدم من جديدة ومن أبداعاته

تحياتي لك ..

صحيح ماقلت وصح الله بدنك مرور مميز . لاهنت