العلاقة فاترة ما بين راسي والمخدة =كلها ساعة و لو كمّلتها فرصة سعيدة
يا هنيّ اللي يجيه النّـوم حين يحطّ خده= ما عرف طرد الهوى و مصادم الروس العنيدة
الغرام مطرّح الفرسان لا بو جدّ جده = كلّ صبح وليل تلقاه متوسّد له وليدة
راحوا أصحاب السروج و راحوا اصحاب الأشدة = في رصيده كلهم وانا رصيدٍ من رصيده
عاشقٍ ما لي ونيس الاّ قصيدي يوم أردّه = والقصيدة يهدّ حيلي مير له حسنة وحيدة
كلّما حسّيت لي فالصدر ضيقة مستجدة=اظهر المسباح من جيبي وأسوّي لي قصيدة
ما اتـــنـقـّى غير بيتٍ عنه ما للعين صدة=ويش ابا بالعقل لن ما جاب لي فكرة جديدة
يوم بعض الناس رمـْيه للهدف دونه و سده = أنقل البندق على الذرعان واجيب البعيدة
والهموم اللي فـ صدري مستريحة مستعدة = صادتك يا قلبي اللي منت صيدت من يصيده
يا غناة الروح يا صبري على غيبتك مدة = قاعدٍ مالي جليس الا الشياطين المريدة
ارحميني و ارحمي قلبي ترى ما فيه شدة = المحبة والغلا يجرون مع مجرى وريده
عالقٍ بين الرجا والياس في حبل المودة = كلّما غربل غرامك فيه قلت الله يزيده
لو على قلبي حديدٍ صلب من حده لحده = والله انك ما تخلينه حديدة مع حديدة
فالوطن كله من الدمام حتى بحر جدة = ما اعشق الا انتي ولا هانت حكومتنا الرشيدة

الأخ الشاعر

وصل العطياني

مبدع بكل حالاتك

صح لسانك ياسمي

تحياتي