يامرحبا يابراهيم الجذع ترحيبة الطيب=في منتدى ربعك الهيلا رفيعين المقامي
وين انت يالشايب اللي كل ليله تدهن الشيب=يبا يجيك الصبح والهوش فالميدان حامي

دام البقا يا المرحب عن مكملت المواجيب=خلك على وزنتك هذي ونعطيك الوسامي
ماني بشايب ومن عاداتنا فرك الأشانيب=مير أنتبه لا تنوش السيف قصاص العظامي

عكف المناقير فيها فرق عن عكف المخاليب=والفرق واضح وحتى لو تشابه فاالاسامي
الشيب مافيه يابراهيم عيب ولاعذاريب=ان كان لاحقك يابراهيم شكه من كلامي

ما بينها فرق غير بصيدها لـــ الصيد اساليب=أنا بوقت الهداد اهد لي حرٍ قطامي
والله ما حولنا يا صاحبي شكه ولا ريب=لكن لابد نور الحق ما يجلا الظلامي

ياذيب ياللي تجر عواك في روس المراقيب=انا حزامك نهار المعضله وانته حزامي
ماتعلم الغيب وانا والله اني ماعلم الغيب=لكن عسى ماتصيب رميةَ من غير رامي

حنا ترانا سوى نكوي ملاحقت المشاهيب=والنار للقوم منا ما تجي برد وسلامي
العالم الله وعلم الخلق من علمه مكاتيب=ومن فضل ربي نميز فالشريف وفالحرامي

يالزير سالم ترا جاتك وصيه من يد كليب=علاك بالميسم اللي في لهيب النار حامي
بكره نبا نارد الجمه ويصفَن المشاريب=ونورد اللي من صدوف الدهر جيعان ضامي

يا ذيب يا ذيب وش علمك سريت الليل يا ذيب=بعض السوالف ترا ما هي حلال ولا حرامي
من يكثر الرمي لو هو يطرح الأهداف ويصيب=يلحقه يا صاحبي لو يطرح الشاره ملامي

ماهي سواليف يابراهيم هاذي (شقًت الجيب)=اهل الاشده ترا ماهم سوات اهل المسامي
لولا البلاجيك جوك اللي يشلون المشاعيب=مافيهم اللي ماخشمه ممتلي كله عرامي

الطيب اللي ليا منه غزا جاب المكاسيب=والا الضعيف يموت ولا لقا ربع الجرامي
بعض الأوادم يشيلون المقاميع المكاذيب=والطايره ما تفجر غير من صاروخ سامي