الجذع شافوه يضحك ويغمز له رشيد=والسناني يكتب املاحظه للهاجري!!
صار فحضوره دعايه ومنها يستفيد= لو يفوز الكرشمي والوصيف الازوري!!

الجذع خاطره يضحك وقلبه من حديد=خل أبو تمام يعرف مقام البحتري
ما يضر اللي يسوق الجمل ما فيه قيد=العرب ما يجهلون القمر والمشتري

الرسائل يالجذع ظرفوها فالبريد= وانت راقد يالجذع قول لي وش تحتري!!
الهدف مرسوم ياذيب والمغزى بعيد= وان عرفت المتهم ماجهلت اللي بري!!

يا علي عيد النظر فالكلام اليوم عيد=لا تحسب أن السوالف نظامٍ عسكري
حدد الأهداف وانقد على رجلٍ يحيد=غير ربي ما عرف ما يكنه خاطري

لاتزاحم لك هوامير ماعندك رصيد= العرب تعرف حصيل الفقير والثري!!
طيع شوري وابن بنيك على الساس الجويد=جوز من رزق الحرامي ورزق المفتري!!

لا تحسب الواسطه تدفعه مع كل سيد=من يكبر لقمته تعترض وسط المري
محتسي شلفا أبن غانم وسيف أبن الوليد=ما يضدونه هل الحوت وأهل القمبري

والله ان الواسطه تغلب الراس العنيد= وان بغيت الصدق منها ترى منته صري!
ودي انك كل ما زادو الكيله تزيد=وتلعب الكسره وتلعب لحون السامري!!

أنت عندك راي وأحيان ما يطلع سديد=استمع وجهة نظر من يبيع ويشتري
تالي الأيام ما بين عمر وبين زيد=من يخطف الجمر خطفه لتمرٍ سكري