سلام الله على الهيلا ..على مرزوق بالتحديد =أنا عايض خويك لاتحسبه واحد ثاني ..!!
يقال الحر الأشقر لاسرح لازم يضوي صيد= لكن دورك هذا والقابله دور العطياني..!!

يقال الحر الأشقر لاسرح لازم يضوي صيـد=لكن دورك هذا والقابله دور العطيانـي..!!

هلا يامرحبا ترحيب ياراع الوفا والجيد = خويّك ياخويي ما اعتقد شرواك يخفاني
تفضل واخذ ماجوبك وجهز مهرتك للبيد = على ماتشتهي بمشي معك ياطير حوراني

خلووووووووووووها :

أبو محمد ... أستلم لاعدمتك:


أنا وضحت لك ياصاحبي خايف تروح بعيـــــــــــــد
خويك وتعرفني زين مايمديك تـنــــــساني..!

قبل فتره وصلني علم.. مدري ليش جبت العـــيــــد؟؟؟
لكن من حسن حظك ماطلع في القوم قحطــاني...!!

انا هرج العرب ماهمني والله علي اشهيد = لكن انته ورى تتبع كلام افلان وفلاني؟
اجيب العيد قبل العيد عادي ما اقبل التهديد = عتيبي سطوتي يشهد لها القاصي مع الداني

انا هرجي عليه اشهود يعني صح بالتاكيد= لكن يالله تبعد عن طريقي كل شيطاني
عتيبي والنعم ماقول فيكم شك يالصنديد = لكن السالفه ماهي تجي بالسيف شاماني

تراك انته تعرف اني ما احب الظلم والتعقيد = ولا ارضى بالخطا لو مصدره واحد من اخواني
ليا مني عطيتك علم لاترجع علي اتعيد = ولانبغى سوالفنا تعوّد دان ياداني

علامك جيت تكحلها(فقعت)العين يابو زيـــد!!= ياليتك ماتطبب مره أخرى ياكحيلاني.!!
مادامك باني قصرك هناك... مشيده تشييد= علامك تترك القصر وتكب أطوال الأيماني.!

ترى الشي المقدر لاكتبه الله ماعنه انحيد = وغلطه مطبعيه (عاديه) من طبع الانساني
ليا يامن المنازل ماتهيت لي على ما اريد = ابا ارحل واترك الديره وبنسا كل ماكاني

أخاف المشكله ياصاحبي في المقبلات تزيـــــد=تسويها تسويها مادامك مانت خسراني ..!
أذا كادوك خبرني وأنا والله لأرد الكيــد= أطب المعركه وأسل سيفي وأسرج حصاني

ليا زادت وش اللي همّني يالله لك التحميد = على غيري ياعايض جعلها تشتب نيراني
انا ماني بحاجة فزعتك عزمي يفت الحيد = مادام انّي على وسق الشداد وعالي الشاني

تريد تسوي اللعبه تراني عارف أنك تريد= ورجل مايهمه صاحبه لاشك غلطاني..!
أثرك مصيبه ولو عشت مدة تركي بن أحميد = خذاك تعاونه ضد أبن هادي وأبن هدلاني..!!

انا وقت الكرم والطيب اصير اكرم من ابن مهيد = وفي درب العلوم الغانمه ما اختل ميزاني
ابن هادي عسى الله يرحمه شيخ ٍ له التمجيد = وتركي شيخ قوم ٍ ينطح العدوان وحداني

أعرف أنك تحل المشكله لاوصلت التعقيــــــد= لكن لاتحسب أن يدك بها خاتم سليماني..!
عسى الله يرحم اللي مات قبل الحكم والتوحيد= شيوخ وقعها برماحها في كل ميداني .!

اقول الك استلمها كاش ما نحتاج للتقصيد = ليا منّي طلبتك حاجة ٍ لاعاد تعصاني
عسى حظك ياعايض بالليال المقبلات اسعيد = واقدم لك تحيه صادقه من قلب ولساني

أبو محمد ...تشرفت بالأخذ والرد معك .. الى اللقاء في .. محاروه أخرى.. أن شاءالله ..

تحياتي