من خاطر الشاعر اللي مايقول الا البيوت الجزال=سلام من هاجسَ ياخذ ويعطيكم من جزالها
انا بقول الحقيقه والحقيقه ماعليها جدال=ياكثر جهال خلق الله يوم اشوف عقالها

من هاجس الشاعر اللي يبدع الأبيات في كل حال=يا مرحبا يا هلا من عقبها الدله وفنجالها
هذي تراها حقيقه يا مطني من قديم الليال=لكن حذرا تميل يا ولد غترتك وعقالها

مال للحمول الثقيله يالجذع الاضهور الجمال=وان كان مانت بجمل شرهة مطني عند جمالها
تال الزمن فعلي وفعلك مغر بجنيه ولا الريال=الناس هاذا الزمن ماعاد تهرج غير بريالها

بعض الحمول الثقيله ما هي بمكسب ولا راس مال=وشعيل لا جا الحمول الجايره فالوقت يشتالها
من ماضي الوقت لعيون المعادي يا مطني خلال=وبعض العرب لو تطب السوق يا بن روق يرثالها

اليا نشدناك خل اجابتك من قيس جنس السوال=لاتطول اقصارها ياصاحبي وتقصر طوالها
انته غزيت اليمن ولاغزيت مع الجماعه شمال=حتى اني انا راعي الصفرا وخيالها

جاك الخبر مختصر لكن عينك للعلوم الطوال=الظاهر انك تدور حيلةٍ فالوقت تحتالها
وشلون تقرب من المنبر وتذن وأنت ما أنته بلال=مير أنتبه قدم لا نكحلك الثنتين بكحالها

الله ربي وربك عالم بمقصدك يابن الحلال=لكن بعض السوالف قول فال الله ولا فالها
اقول قدام لاخليك للعربان مضرب مثال=خلك في حالك وخل الناس يابراهيم في حالها

ترا الدعاوي عوافي يا ولد ما هيب روح وتعال=اصبر يلين اليال اللي عليكم ينقز اهلالها
تقول وام القرون اتموت ما هزت سفوح الجبال=لكن شوف الأوادم ويش من زالك ومن زالها

والله ماضاق خاطر من سوالفكم ولاشان بال=لو كان بعض الاوادم من علومي ضايقَ بالها
ام القرون ارضعتكم عام الاول يوم كنتم عيال=واليوم ماكنك الا يالجذع واحد من عيالها!!

أن طعتني يا مطني لا تدور معي حرب وقتال=خل الأذاعه تذيع اشوي قبل اشفر ارسالها
هذيك منها عليك وصوف كب الخثرقه والخبال=حتى لبنها ترا ما زال في لحيتك وسبالها