آلاد عاصي يا جبر عطبة الشظى = ليا حولت عقبانها مع صقورها
أهل المتارس يشهد الله لفعلهم = ليا قامت الهيجاء ودلت وزورها
هم ربعنا بالخص دون غيرهم = يوم انهم في الدار يا كثر نورها
والله مانرضى بجار بدالهم = ما دامت الدنيا على قرن ثورها
اليوم منهم خاليات ركونها = عاين منازلهم تحاوم نصورها
شدوا ولا في دبرة الرب حيله = يوم اجزلوا عنها تعلوا ظهورها
راحوا كما نو تقافت سحايبه = ليا هبت العليا وقامت تكورها
آلاد عاصي عز من يعتزي بهم = ليا حام حايمها وفارت قدورها
ضلت منازلهم ورانا ودونا = تلطم سبور القوم عنا سبورها
مشاعل بالليل يمشى بضاحهم = اهمه اسود الدار وهمه نمورها
الطيب مقسمهم من اول جدودهم = وحياة من يعلم خفايا سرورها
رجالهم كل اللوازم يسدها = يشفيك لو جالت وطالت دهورها
حمولة يا ويها من حمولة = في كل درب وافيات شبورها
نعم بها غصب على الغيض والرضى = يوم الفتن وابليس مفتاح سورها
لطامة العايل وحماية الوطن = زحازيح يوم الغيض يملى صدورها
ليا ناحرت نار المعادي لنارهم = ضياغم روس النشامى نقورها
ليا خيلت بالسم والطارق الخفي = تركز لعيدان البلنزا نحورها
مثل الجمال اللي تضارس لحيها = كم واحد حطوا بعينه ذرورها
كم شيخ قوم من طرفهم منيته = خلي عشا لسباعها مع طيورها
عاين منازلهم وعاين زرابهم = فيها ليا وقت البعث مع نشورها
في الصبح نواس على ذاري الخلى = وبالليل تسهر في المجالس نجورها
تشهد لهم السكين والقدر والصحن = والجار عقب الضيف يشبع بسورها
ما قلت فيهم كذب والشاهد الله = جابة صدوق ما تقطع عقورها
هذا ويا راكب على وسق حرة = حمرا بعيد الكوع عن ضد زورها
اما سدس ولا على شق نابها = شناح صدر وينكس وينكب الني كورها
لها ثمان سنين ما دارها الجمل = يوم الجمال تهيج حزة هدورها
ما فوقها يكود قربة ومزودة = ودلة نجر وستر ربي يسورها
تسرح صلاة الصبح وايضا ولا اوجبت = من قصر ابن ثعلي سريع حدورها
ركابها ما غير راسه وراسها = راسين والراسين فيها نعورها
وليلة ثلاث ليال توصلك بالرهى = وادي جهام ولك تيسر امورها
وحزة تجيهم يا نديبي مباشرة = رد السلام وشف ترا ويش شورها
اضنهم شافوا وعافوا وبرقوا = في ديرة قامت تخلف بدورها
يبغون نجد ونجد راحت جمايله = راحت طراته ما بقى إلا خدورها
تلقى الرجال يقابلونك بمرحبا = واهلا وسهلا بانشراحة صدورها
واقلط على صفر الدلال المكرمة = برية والهيل دايم بهورها
صفر حبايب قربهن نجر مثلهن = في مجلس والعود الازرق بخورها
من عقبها عليك قم للمناسف = مفطحات كني انظر وقورها
يا مال هجر العين ياما ويا ما = تصعب علي ان جيت اعدد نشورها
ورد السلام من الهجيري وخصهم = كل الجميع غيابها مع حضورها
و ختامها مني صلاة على النبي = اعداد ما خط القلم في سطورها

المشاركة الأصلية كتبت بواسطة مخلد آل مبارك (المشاركة 1074256) أخي العزيز فهد بيض الله وجهك على الموضوع الاكثر من رائع وعلى القصيدة الي يستاهلونها العوازم الاد عاصي والله يرحم الشيخ عبدالله ويسكنه جنات النعيم

المشاركة الأصلية كتبت بواسطة فهد علي العازمي (المشاركة 1074277) كفو يا أبن جزعاء بيض الله وجهـــــك وبيض الله وجه الهجاري شاهد الأحداث دائما وكنت أبي أقرن معها موضوع له صلة قلت من الأفضل طرحه في صفحة كاملة وهو قصيدة شيخ سليم ((ياروق من دونكم عازوم ضلع بتيل .........الخ قريبا إن شـــــــــــاء الله كل الشكرررررر يالغاااااااااااالي

المشاركة الأصلية كتبت بواسطة خلف الروقي (المشاركة 1074621) من قدم الطيب يستاهل الطيب ولا يضيع الطيب والجيرة الطيبة بين اهل الكرم والمروه صح لسان العضياني قصيدة وافية في من يستحقها بلا شك وتسلم يمينك يافهد وبيض الله وجهك

المشاركة الأصلية كتبت بواسطة مشاري الحبردي (المشاركة 1074642) ونعم والله يالاد عاصي ويسدك الاسم وصح لسان الشاعر

المشاركة الأصلية كتبت بواسطة العازمي (المشاركة 1075296) نعم الجيره والقبيله يالعضيان بدون قصور فالقبائل ورحم الله الشيخ مرزوق بن جزعاء وعياله الذين ملكو العوازم في نجد وصح لسان العضياني قصيدة وافية في من يستحقها بلا شك وتسلم يمينك يافهد وبيض الله وجهك

المشاركة الأصلية كتبت بواسطة عبدالمجيد النفيعي (المشاركة 1075408) ونعم والله في قبيلة العوازم‘آلاد عاصي‘ ونعم العزوه و صح الله لسان الشاعر الذي يتضح لنا قوة فقدانه لجيرتهم من خلال قوله شدو ولا في دبرة الرب حيله

المشاركة الأصلية كتبت بواسطة ذيب العازمي (المشاركة 1075533) صح لسان زيد الهجيري وبيض الله وجهك اخوي فهد العازمي على النقل وياليت تنقل لنا رد الشاعر شايد بن عمار بن عواده العازمي على الهجيري اذا كان تحفظه وشكراً

المشاركة الأصلية كتبت بواسطة ولدعساف (المشاركة 1075618) ونعم مليون تردفها مليار بالعوازم الاد عاصي .. لاهنت يافهد :) !!

المشاركة الأصلية كتبت بواسطة العــــــــابر (المشاركة 1075619) الله يرحم الهجاري شاعر كبير وفحل حبه لربعه ولقبيلته ولوطنه كبير كان يصف الحقيقه ولايداهن ولايتملق الله يرحمه ويسكنه فسيح جناته والاد عاصي نعم اللابه ونعم الربع انشهد وافين وعلومهم غانمه مادحهم الله مايبيلهم مدح والهجاري فعلا افتقد جيرتهم وكذلك الثعاليه حيث انهم بني عمومه وكانوا فالحرب والسلم سواء لاهنت ياخوي سلمت يمناك على نقل هالقصيده الرائعه وصح لسان المرحوم الهجاري. واذا تملك له قصايد ارسل لي رساله .

المشاركة الأصلية كتبت بواسطة ابومشعل العازمي (المشاركة 1075740) بيض الله وجهك فهد على النقل وصح لسان العضياني على القصيدة الجميلة ويستاهلون الاد عاصي وكفو

المشاركة الأصلية كتبت بواسطة فهد العازمي العتيبي (المشاركة 1075753) ما عليك زود اخوي العابر السليس ولاهنت على الكلام الطيب والمرور العطر الرائع ،،،

المشاركة الأصلية كتبت بواسطة سلطان نايف العضياني (المشاركة 1076341) صح لسان زيد الهجاري والنعم بآلاد عاصي يستاهلون المديح وهم أهله لاهنت يافهد

المشاركة الأصلية كتبت بواسطة محمد القبع (المشاركة 1081450) بيض الله وجهه الشاعر زيد على القصيده الجزله ويستاهل ابن جزعاء وقبيلة العوازم بدون قصور بالقبايل يعطيك العافيه يااخ فهد على الطرع الجميل واصل ابداعاتك

المشاركة الأصلية كتبت بواسطة الحبيني (المشاركة 1081462) صح لسان الشاعر زيد الهجيري و ونعم فيه وفي قبيلته العضيان ولايهونون قبايل عتيبه. أشكرك أخوي فهد على النقل وتقبل تحياتي..

المشاركة الأصلية كتبت بواسطة احمد منير الروقي (المشاركة 1081520) السلام عليكم ورحمة الله وبركاته الله لايهينك اخوي فهد على الموضوع ونعم بالجميع ورحم الله الشاعر الهجيري وصح لسانه والعوازم كفوا ولاهيهنون جميع القبائل