يا وافي جاوب يوم اناديك بالحال =اسرع ترى يابوك حالي عطيبه
قم فز سولي من الكيف فنجال =وهات القلم والحبر واللوح جيبه
اكتب بيوت(ن) بدعها يشرح البال =تجارب(ن) من شايب(ن) بان شيبه
وانا تراني معلق(ن) فيك الآمال =بعد الكريم اللي مناجي حبيبه
حنا بدنيا شيبت روس الاطفال =تغري رضيع الديد و يترك حليبه
دنياك هذي مثل ما قيل مقيال =والعبد ما يدري وش اللي يصيبه
ابيك انا يا بوك لأخوانك اظلال =لا تستمع فيهم كلام الخطيبه
وابيك انا يابوك في كل الاحوال =ندي كف(ن) ما يحسب ذهيبه
وليا انشدوك الناس قل والدي قال = اللي تضويه الليالي تغديبه
ابيك انا يابوك تضربك امثال =وليا اعتزيت اعتز بربعك عتيبه
السيل ما يمشي على غير مسيال =والوادي اللي سال غزر جليبه
والذيب ما ينزل من الرجم للجال =ابيك انا يابوك تقنب قنيبه
وليا نزل خله فلا هو بريبال =احيان يشبه حصني الضلع ذيبه
وحذر من اللي يجيك للحكي نقال =هماز لماز بنميمه وغيبه
اذا قعد في مجلس(ن) بث الارسال = موجات ينقلها بعيده قريبه
عيب(ن) على الرجال كل ما سمع قال = ولا المهبل كل شي اتهذيبه
وحذر ابو وجهين له عشرة احبال =وهذي على الرجال اكبر مصيبه
لا له مواثيق(ن) ولا عهد دجال =يبور و اول ما يبور بصحيبه
رْجال في وقت الزعل ماله ارجال =ان ما جات له بالطيب اخذها غصيبه
يدوس المخاطر ما حسب هول الاهوال = هذه عسى تخطيه والا تصيبه
ورًجال ما تخطي على الناس عقال =ما قالو الدنيا تجي بالغليبه
ون جاتهم زله على المخطى اثقال =يجي حقهم وافي جمايل وطيبه
ورْجال يوم اشبهه مثل تمثال =قوم(ن) تسيربه وقوم اتعديبه
ياقف ليا وقفو و اذا ميلو مال =هذاك لا يغزي ولا ينغزيبه
ورجل(ن) دليلة ربعه ايحل الاشكال =يفك النشب قبل احتدام المصيبه
بعيد راي ونظر حلحيل حلال =وليا حكم الكل حكمه رضيبه
ورجل تحت تصريف من يلبس الشال =يسعى يبا يكسب رضاها الحبيبه
واذا بلاه الله بعد وقت بعيال =يزري يربيهم عيال الغضيبه
يجي وسط ربعه كما الديك يختال =لا نال له حشمه ولا نال هيبه
وليا نويت الدرب والدرب مدهال =اختر من ايهون عليك المغيبه
ترى العرب قالو قديم(ن) بالامثال =ان السفر يبدي على الرجل عيبه
اسمع كلامي زين يا طيب الفال =هذه كلام الصدق ما فيه ريبه
اول ما يخدع فالرياجيل الازوال =والثانيه منطوقه اللي يحكي به
والثالثه يخدعك بالعم والخال =ون بانت الك الرابعه وش تبيبه
يا كثرهم من يلبس اشماغ وعقال =منظر وشخصيه وجسم(ن) وحيبه
ان كان ما تصدق الاقوال بافعال =كل واحد(ن) بالهرج يغلب كتيبه
رجال يسوا له ثما نين رجال ** =ثوب المراجل ضافي(ن) يكتسيبه
ورجال يسوا ربع او نص رجال =وكل واحد يفتش مع الناس جيبه
ورجال ما يسوا ولا فردة انعال (كرمتم) = ولا له مكان الا بوسط الزريبه
ون كان انا غلطان ابا حط معدال =معدال وافي للرجال الطليبه
ولا درينا عن مشاريه الانذال =قسمتها والكل يعرف نصيبه
في ذمتي ما كل رجال رجال =يلزم على كسب المراجل ضريبه
يًبذل لها جهد(ن) ويًبذل لها مال =ما هي بورث اجدود لكن كسيبه

حنـا بدنيـا شيبـت روس الاطـفـال=تغري رضيع الديـد و يتـرك حليبـه دنياك هـذي مثـل مـا قيـل مقيـال=والعبد ما يـدري وش اللـي يصيبـه

رجال يسوا له ثمـا نيـن رجـال=ثوب المراجـل ضافـي(ن) يكتسيبـه
ورجال يسـوا ربـع او نـص رجـال=وكل واحد يفتش مـع النـاس جيبـه
ورجال ما يسوا ولا فردة انعال (كرمتم)=ولا لـه مكـان الا بوسـط الزريبـه
ون كان انا غلطان ابـا حـط معـدال=معـدال وافـي للـرجـال الطليـبـه

والذيب ما ينزل مـن الرجـم للجـال = ابيـك انـا يابـوك تقـنـب قنيـبـه = وليا نـزل خلـه فـلا هـو بريبـال =