البـَحـَر والشّعـْر تربطهم مواثيق و زمالة=من يردّ الموج والشاعر ليا هبـّت هبوبه
يا بـَحَر لوّ أكتب أبياتي على موجك رسالة=بيت واحد من بيوتي يقلب أملاحك عذوبة
يا بَحَر يا ليتني باقي على طيش الجهالة=يوم كنت صـْغِـير ما اعاني من الدنيا صعوبة
الفرح عنده موظّفني ومعطيني وكالة=للضحوك وللمزوح ونزوة النفس اللعوبة
ويوم كمـّـل عمري العشرين قدّمـْت إستقالة=الفرح عيـّا اسلوبي لا يوافق مع اسلوبه
القوانين القديمة والمذاهب والأصالة=تلزم الرجـّال لوّ الحال ماشي دوب دوبه
يا بـَحَر والله ما شيّب روسنا غير الرّجالة=عيب نسكت وإن هَرَجْـنا كلمة الرّجل مْحَسوبة
يا موصّي . لا توصّي صاحْبـِك يلزم رياله=وش يسوّي بالفلوس اللي تبرّت من جيوبه
أنت وصـّـلْت النصيحة واتركه مالك وماله=الكرم ماهو مجـنَّب عنه لو إنـّه عقوبة
كمّ مرّة جاه حملٍ ما يطيقه وارتكى له=من عناده للحمول الجايرة ما قال توبة
لو تسلّف واجب ضْيوفه من هْنود البقالة=مع صلاة الظهر في جدّة وفي عزّ الرطوبة
لجل ما يدرون ضيفانه بحاله كيف حاله=مايجيهم غير مستانس ويضحك مع جنوبه
كرّم الله لحية اللي ضيفه يكرّم سباله=وسوّد الله لحية اللي يعطي ضيوفه ذروبه
البخيل تشوف وسم الضّيم حتّى في عياله=ما تقول الاّ مشَــلْوطهم على النار الشّبوبة
والكريم ليا عطى كنـّه ما يعطي من حلاله=لو طلبته ثوبه اللي لابسه يعطيك ثوبه
نعنبوا جدّ البخل واللي يحطّه رأسماله=البخيل بْخيل ما يعطيك حتــّى من ذنوبه .!