يا عتيبه و الغلا فالوقت لا يرخص مقامه=في صباح و في عشيه حسبي الله حسبي الله
في طريقي شفت لي صقرٍ شلع كفه حمامه=و الحمامه ساحليه حسبي الله حسبي الله

الغلا موجود يا شهران وبيوت الكرامــه=عامره والنار حيه حسبي الله حسبي الله
علم والا حلم مر اللي يعده في منامه=قبل نفتي فالقضيه حسبي الله حسبي الله

جابك الله يا رعد من نجد و الّا من تهامه=بين ذيك و بين ذيه حسبي الله حسبي الله
يكفي الموجز عن التفصيل و المعنى علامه=محزمك و البندقيه حسبي الله حسبي الله

الله اكبر كان تجهل دار حامين الجهامه=من حكم نجد العذيه حسبي الله حسبي الله
اللسان اليا نشب وسط الجما يقصر كلامه=دون برج الفيصليه حسبي الله حسبي الله

احسبنّ الفرخ فرخ الصقر و اثر الفرخ هامه=ما بقى غير المنيه حسبي الله حسبي الله
عان برج المملكه يفرق عن اللي قلت قامه=لا عليك و لا عليه حسبي الله حسبي الله

المثاري ماقدر يملك شداد ولا مســــــامه=رجلي ولا له مطيه حسبي الله حسبي الله
من سرى ليل الشقاء ما يشكي الا من ظلامه=يا الليال الخرمسيه حسبي الله حسبي الله

جايعٍ يبغى يعيّف راعي الطرقه طعامه=ما تكفّيه العطيه حسبي الله حسبي الله
كان ما تقدر على عوم البحر يا بو دلامه=خلك بنجد العذيه حسبي الله حسبي الله

الحــــواله فاضيه والبنك يبغاله غرامه=بالسند غش البريه حسبي الله حسبي الله
ما بقى الا كم علامه من علامات القيامه=بذت الشيخ الرعيه حسبي الله حسبي الله

عقب هاذي يا رعد يمكن نلبّسك العمامه=شاعرٍ عنده حميه حسبي الله حسبي الله
الله انّه يرحم ابن سعود كسّاب الزعامه=وردةٍ في مزهريه حسبي الله حسبي الله

القصر راعيه فايز بالغنيمه والسلامه=لا تقدم له هديه حسبي الله حسبي الله
وانت يالحر القطامي ما نلحقك الملامه=هدتك ماهي شويه حسبي الله حسبي الله