عدد نبت الربيع وعد ماينبت من النوير=سلام الله سلام ٍ وافين للمنتدى واعضاه
انا خابرك في هاك الوزاره منصبك وزير=وتركت انت الوزاره والسبب لازم نعرف ادواه

هلا يا مرحبا ترحيبةٍ يبن الجزيره غير=من اللي ما نزل بالسوق لا بيعه و لا مشراه
انا عندي قناعه و القناعه توجب التغيير=لونّ الشيخ باقي ثابتٍ كوعه على مركاه

يدوم الك البقا ياللي ترحب باجمل التعبير=تعودنا على ترحيبك الوافي وماننساه
ولكن كان رجمك ياعميلي هيّن و يسير=ترى رجم العرب صعب ٍ ولا كل ٍ قدر يرقاه

تراحيب الوفا لهل الوفا و الخير عقبه خير=لعل الذيب الاسحم يقضي الحاجه معَ مسراه
ترى الحبل الطويل يجمّلك لا ما وردت البير=تبا تارد و تصدر يوم غيرك يابسٍ به فاه

علومك وافيه ياللي تنومس باغي المسير=ترى صوت الذيابه لا ارتفع الذيب جر اعواه
انا خابرك يارجال تزها رتبت المدير=ولكن شد حيلك والعوض فاللي عرف مضماه

الا يا طير ريشك ما يشابه ريش كل الطير=علامه مختلف لونه و شكله غير في حلْياه
توصّيني و انا اللي شامخٍ راسه سواة النير=لكنّ الله يبارك فيك و الطيّب على ملفاه

ترى لونك توصف ثم توصف يب يجي تقصير=وبلاها والله ان الطير عند اللي عرف يرفاه
ترى في شرع ابن حنبل عليه اسناد ابن جرير=يقول الجره اللي قصها العراف ماتخفاه

ترى سوق الذهب و الماس ما نقبل به القصدير=كلامٍ فيه شي و شي و الفاهم على معناه
لعل الموتر اللي ما يسير الّا بدهن السير=يطيح بحفرةٍ من شافها يقول وا عزّاه