يامرحبا رحب وافي من صميم الضمير = بالطارف الي مسح فالدرب طلبونها
الحيل حيل الفرس والحمل حمل البعير = والي يجي قدمها ماطاح من دونها

اللك البقا ياالمرحب والرحا تستدير=والطارف الي وصلك يغني لحونها
يا فارس السالفه لنكان صحت تصير= أن كان جبت العلوم أجيب مكنونها

ياطير يالي معك جنحان حلٌق وطير = ترا العرب ماتناظر غير بعيونها
عزالله اني معك في شر ولا في خير = يالو تعلٌونها ولا توطونها

الطير طاير ويلقا صيد صيده وفير=يشبع عيال العرب ويخفف أحزانها
أمشوا معي لين أوصلكم على جم بير=والي يبا الطيبه يتعب على شانها

في سوقنا كل واحد له زبون وخشير = ماتشتري غير من ناس يعرفونها
وان كان فالسوق تاجر ياالعتيبي كبير = جرٌته من فوق سطح الارض يخفونها

من محتكر سوقكم بقشان ولا الحكير=وبضاعتك خلها في جوف كرتونها
المشكله فالموظف يوم خان المدير=ما يعرف أن الامانه ضد خوانها

السوق مفتوح مار المشكله فالوزير = الي يدير الوزاره عكس قانونها
الي معه ياطويل العمر سيف ٍ شطير = يبا يقص السيوف الي يحدونها