الاصعر يحسبنّه لآ طلع في شاشة المرقاب = يعرفونه جميع الناس ,, يا دنيا من انتيله
وقبل اسبوع يومن المحاني لمّة الاصحاب = تحّير ما لقى مجلاس ,, يا دنيا من انتيله

مطاليعي مطاليع السعد (يامخلف الهنداب)=لا تبني بيتك بلا ساس ,, يادنيا من انتيله
حضر فالواجب اللي دون ربعه يخلص الطلاّب=وانا فيه ورفيع الراس ,, يادنيا من انتيله

تبى علمي مطاليعك يبو سيف ٍ بدون نصاب = مثل عباس ابن فرناس ,, يا دنيا من انتيله
علآمك منت مثله يوم مثله شرّف الاقراب = يا شينه حظك المنحاس ,, يا دنيا من انتيله

تراك اللي على راسه يضويها بدون اسباب=ماعندك فالضمير احساس ,, يادنيا من انتيله
ابو زيد الهلالي فاللزوم يقوم دون ذياب=لاكن انته يابو نواس ,, يادنيا من انتيله

لو ان الله يحطك في يديّه كان بالمشعاب = تعوّد وانت فيك الباس ,, يا دنيا من انتيله
تقوله مار انا ادريبك , وجرحك ملتهب ما طاب = على همام يا جساس ,, يا دنيا من انتيله

انا ابا انصحك لا ترفع رجولك عند راس الداب=تموت وتلفض الانفاس ,, يادنيا من انتيله
اضن بخير فيك وضني اللي كنت اضنه خاب=اثر لو ماعليك لباس ,, يادنيا من انتيله

انا ما نيب مثل اللي تهبّد ما معه مشهاب = ما يخذ معه لو مقباس ,, يا دنيا من انتيله
الاصعر صاحبي من صغر سنه لين راسه شاب = وهو بين الرجا والياس ,, يا دنيا من انتيله