يادوسري كثر التوجد على ويش = لاتشتحن وتزيد كيل النخاوي
اقفل مجال اهل المعاذير باالشيش = واعنز على الرب الكريم الغناوي
اطو الفراش وودع ام النقاريش = خوتك والله ماتجي باالمناوي
والله لوردك العدود النشانيش = زحول الرجال مخلصين الدعاوي
اهل البيوت امتعبين الطواريش = اللي لهم حول المعقم حراوي
في شف قطعانٍ لها الكبر والطيش = ميزه الليا طق اللبيد متساوي
وضح البكار اللي وبرها عكاريش = وصفر ومجاهيمٍ عليها العطاوي
مارددوها في شبوك الدراويش = ولاصلفقوها مع نعيم الشواوي
مرباعها في خايعٍ مابعد نيش = نبته جديد وجاه سيلٍ رهاوي
وبطرافها خطو العيال المداغيش = الاد روق مدلهين الجلاوي
ابن عماره متعب الخيل والجيش = وابو بطين اللي للامجاد حاوي
واللياغدى كسب المراجل تناوش = يقدم لها شامان شفقٍ شفاوي
ربعٍ على فعل الجمايل معاطيش = لاشح باالهين ضعيف الجداوي
في ظلهم يمشي قليل المحاويش = ويدله لو انه من زمانه شقاوي
كنوز الرجال مبعدين المغابيش = سلايل اللي يخلفون الهقاوي

صح لسانك وبيض الله وجهك