الشعر له فاتل وناقض وفاروق = والسوق له سايم وشاري وبايع
واللي ربح ببضاعته يمدح السوق = والناس تطلب نادرات البضايع
يامدور الطيب تخير على الذوق = واحفظ معك من قول فارس ودايع
لو كان بالارشاد والنصح مسبوق = ذكرى لعل لها ترق السمايع
جواهر معها شذى المسك مرفوق = ومعها التجارب مثبته بالوقايع
واللي لبس من جوهر المرجله طوق = مثلي مجرب والتجارب نفايع
سافرت لي طرقة وطبيت لي سوق = وخاويت في دربي جميع النزايع
والله خلق فالناس ميزات وفروق = الناس شتى بالشيم والطبايع
احد على مبدا وله نظره فوق = واحد كما ثلج على القاع مايع
ولاني وكيل ادم على كل مخلوق = لكن اشوف بخلق ربي نوايع
اشفق على الطيب ولي رفقته شوق = غريب والا من قريب الجمايع
وراع الردى من دونه الباب مغلوق = بيني وبين اهل السفاله قطايع
الطيب واهل الطيب عاشق ومعشوق = والطيب له مبدا وحكم وشرايع
والمرجله وهبه من الرب ووفوق = والدين راس المرجله والطمايع
والرزق من ربي وله فرض وحقوق = ومن يطلب ارزاقه من الخلق ضايع
والاخذ بالاسباب ثابت وموثوق = وتوفيق ربي هو خيار الذرايع
ولاكل مطرود كما قيل ملحوق = قول مبالغ فيه لو كان شايع
ان ماجلبها والي العرش برفوق = كثر المطارد مايحوش النفايع
ومن يحسن النيه مع الناس مرزوق = ومن يتقي ربه دروبه سنايع
والكذب ثوب ما يجمل ومشقوق = ولاينرفي شقه بكثر الرقايع
ومن لايحط اسرار قلبه بصندوق = ويجود المفتاح عن كل صايع
يفتح على نفسه مداخل وخازوق = وقناصه الفرصه تزيد الجلايع
ومن يقرب الانذال لا يامن البوق = النذل خاين ما يصون الودايع
عقرب ثرى والا كما ناب زاروق = لا صادف الغرات للسم زايع
واحذر ترى النمام للشر ناتوق = دايم يقرب للشرار الولايع
من المكارم خارب القصد مسلوق = وعقله لنزغات الشياطين طايع
وترى الردي شمع على الحيط ملزوق = لا اونس حميم الشمس جاك متمايع
احذف ردي المعرفه حذف خملوق = لاتنخدع بالزبرقه واللمايع
عليك بالطيب ليا صرت مزنوق = اللي فعوله كلبوها روايع
يشيل عنك من الصعيبات طاروق = ولا يلحق المنه جميل الصنايع
لامن عن الواجب هبا كل مزلوق = يقوم بالواجب بعيد الرمايع
والشارب اللي ساعه الضيق محلوق = وقت الرخاء ما احد يبي له فزايع
خله ولو شفته على الوجه مصفوق = ولاتستشير مجالسين الربايع
وان كان في صدرك قنا الوقت مزروق = خلك على الشده قوي البتايع
واضرب على الكايد لايلحقك عوق = واطلع سنود وخير ربك طلايع
والشمس لو غابت يجي صبح وشروق = والحق له صيت مع الناس ذايع
يقدم عزيز الساس لو كان مفهوق = وياخذ عظيمات المرجله قلايع
وأبليس اخو مره مربط ومفلوق = وفي كل يوم يزود حر ولقايع
نركي على كبده مراقيع وحروق = وعروق قلبه من وحمنا مزايع
وصلوا على الهادي عدد ما أرمش الموق = وعسى لنا من جود ربي شفايع

المشاركة الأصلية كتبت بواسطة الطير خله ولو شفته على الوجه مصفوق = ولاتستشير مجالسين الربايع