كل ماغبت زاد الضيق والاكتئاب = في فضا الحرف والكلمه وتضمينها
تحت عين الجراده فوق صدر الغراب = ارسم الورد واكحل بالذهب عينها

السوالف بعضها سمّ عقرب وداب=والبيوت الثمينه صعب تلحينها
يا مشرّع بيوته لا يطيح الزهاب=خنجر القوم طاحت فوق سكينها

انت ضامي ورد في ليل والنور غاب = حاسها واختلط ماها على طينها
مشكله عقب ذاق الفار تمر الجراب = ما بقى الا الرحا لا يلحس طحينها

بعد نوم الهداني زان طاقه وباب=لو تعيش القماري ما قضت دينها
لا تجر الربابه ولا يطيح النقاب=وأنت من جملةٍ دقت مواعينها

ويش ابا فالقماري جعلها لذهاب = سنبلة قمح وحده تملي ابطينها
تبكي الارمله سن الصبا والشباب = يوم من جيبها تكسي مساكينها

يا مؤرخ تعب يقرى وطش الكتاب=مشكلة مصر ماتت في بحر سينها
يا ابن صحبي وخدك تحت وأم النصاب=تخبرك والسوالف من برهينها

ما بقى فوق سطح الارض غير التراب = علم البدو لا تشعب بعارينها
فوق زار البعير اشعيل مضراب ناب = من سباع الحجاز ومن سراحينها

العظام الرمّيمه عرمشتها الكلاب=و أم قرنين تضوي في مراحينها
لو يهز الكتوف ولو تطول الرقاب=صيدةٍ من زمان العام شاوينها

المشاركة الأصلية كتبت بواسطة الصقيل المجرب (المشاركة 1002556) آحم آحم جميع من مر على الصفحه له جزيل الشكر