سلام الله على العمده من اهل الطائف المانوس = رجال العرف والمعروف واهل الديره الحيه
صحيح ان الزمن قاسي ولكن الحياه ادروس = ومن يجهل علوم الناس لازم يخلف النيه

هلا يا مرحبا ترحيبة اهل الطيب والناموس=عن اهل البحر الاحمر والسجلات التجاريه
أقول القوس لا تعطونها الا كف باري قوس=ولكن اكثر العربان عيت تلتفت فيه

ليا حدّك زمانك للمناطح مع كبار الروس = تبا تحسب حساب الكلمه اللي جات ملويه
هذا من حظك الطيب وحظ الصاحب المنحوس = ترى ماكل مره حظكم ميه على ميه

كبار الروس لن مافاد فيها حد راس الموس=علاها حد سيف ومن تحتها حد شبريه
على عين المفتح والعمى دار العرب مديوس=وصح النوم كلمة روح قلها للشواويه

ليا دارت رحاها لاتشيل السيف بالمعكوس = يجيك الفارس اللي مامعه رحمه وماويه
يخيّلك صعيبات الهقاوي عقلك الملحوس = تحسب ان الليال السود ممشيه ومسريّه

ابو زيد الهلالي لا لقيتــــه بوس راسه بوس=تراها كان ماعندك خبر حاجة طبيعيه
يردون البرا اهل الخيل واللي في ظهر جاموس=ثنى من دون قوم وراح طمعة للشقرديه

مضرينك ببوس الروس قوما" علمهم محسوس = ومن علمك وفي علمك ارى فيك الاماريه
نفشت الريش من زود التباهي فيك يالطاووس = وجاك الصقر نتف ريشك اللي ماترى زيه