تهب الريح بأمر الواحد المتعلي الخلاق=تهب وتمتطي ظهر الجناب وتدفن ربوقه
تهب وكل ماهبت تطيّر يابس الاوراق=وتومي بالشجر وتصافقه وتصرمد عذوقه
وهي نوعين وإحداها قسم بالله ماتنطاق=عذاب وكل ماهبت يهل الدمع من موقه
ومرها الله عقاب وذنّب ماهي ترجمة اشواق=عقوبة عالمن نسيوا فروض الله وحقوقه
لكن الثانية لا جات حطوا للرواق رواق=ترى ديمومة المنشأ تغط النور وشروقه
جعلها الله لقاح ودافعة للسحب والبراق=تسوق المزن بأمر الله ليا من قرر تسوقه
تجي مثل البشاير في عيون المغرم المشتاق=تجي وتبشر الظميا بوبل الغيم وبروقه
عساها كل ماهبت تنومس خطّر العشاق=عشاشيق الطبيعة والقنص والطير وسبوقه
وعسى مزنن معاها لاتروى بالمطر ينساق=على شبه الجزيرة والديّر تروى من حقوقه
وأخص ديار قومن فعلهم للمجد طاب ولاق=نشاماً للمعالي خيلهم ماهي بمسبوقه
ديار ألي تعلّو فالسنام ومدّو الميثاق=سنام المجد والطالة وفعل الطيب وفروقه
رجالن فعلهم مشهود لا جاء للفعول سباق=ومكانتهم مع التاريخ محفوظه ومرموقه
أهل وقفة وأهل نخوة وأهل هند(ن) تقص أعناق=وأهل مدّ(ن) جزيل وسمعتن ماهي بمفهوقه
عتيبة عزوتي لا حدني وقتي وصدري ضاق=طحاطيح الرجال ألي على الطالات مخلوقه
مقابيس الوغاء ستر العذارى علة البواق=خوال المصطفى ألي ماتعدا الحق منطوقه
عساهم بالهناء والخير والتوفيق والأرزاق=وعسى مرباعهم وبل السحايب ينهمر فوقه
من العارض ليا الطايف ليا ديرة ذوي زراق=تباشر بالسيول وديرة الحساد محروقة
يرسي فوقها من دون تعذيب وسخط وإغراق=مطر رحمة وخير ودلة الظيفان مسيوقه
يرسي فوقها عشرين ليلة والسعد ينحاق=على وجه البسيطة والثرى تتبهل عروقه
تعاقبها السيول ألي تسر الصدر والأحداق=وترجع بسمةٍ في لاهب الايام مسروقه
وينبت فالفياض العشب وألي للحيا عشاق=يجي لا حالوا الحوال ضينه في طرف نوقه
هذي غاية طراة العمر والله لايجيب فراق=مابين أهل الصطر برقا وبين مطنخ الروقه
عتيبة عزوتي لاحدني وقتي وصدري ضاق=طحاطيح الرجال ألي على الطالات مخلوقة

المشاركة الأصلية كتبت بواسطة عبدالله بن صلهام (المشاركة 975837) ابراهيم خلف الزراقي صح لسانك على هذه القصيدة الرائعة أنت شاعر متمكن من أدواتك الشعرية تمنياتي لك بالتوفيق يابن العم

المشاركة الأصلية كتبت بواسطة ابو فايح (المشاركة 976108) هذي غاية طراة العمـر والله لايجيـب فـراق***مابين أهل الصطر برقا وبين مطنـخ الروقـه صح لسانك يابراهيم مدد بلا عدد

المشاركة الأصلية كتبت بواسطة ذيبان (المشاركة 976154) الله يابو خلف مبدع مبدع مبدع صح فكرك وقلبك وكلك تثبت يالامير ننتظر الجديد

المشاركة الأصلية كتبت بواسطة مشاري (المشاركة 976176) صح لساااااااااانك يالزراقي تحيتي..