سلام رديه تعدى مثل برقٍ في سحاب=ياشاعر مانيب عارف حسنته من سيته
ان ماهداه الله كويته في الذهاب وفي الاياب=لين اني انجض ياعتيبه بالمياسم كيته

يا مرحبا ترحيب يلمع مثل لمّاع السراب=يا شاعرٍ مع عزوته ما هو مصفّي نيّته
احسب حسابك قبل ما تضرب بسوطٍ من عذاب=ماني على كيف الرخوم أهل الوجيه الميّته

دام البقاء للي خلق وانذر عدوه بالعقاب=واوعد عباده يوم تقرير المصير بفيته
انا ادري انك كبر ضلع طويق يرقاك العقاب=الخير عنا تمسكه والشر عنا بيته

منّا العدو يونس على كبده حراره و إلتهاب=بالرجل ندعس عقرب الوادي و ندعس حيّته
الضلع أخير من الزريبه ما عليها الاّ الغراب=يالشاعر اللي فوق راسه قالبٍ طاقيّته

انا ادري انك ظفر ماتحسب حساب ولاتهاب=من خوف عنتر لو يشوفك مايمد يديته
السيل من تحتك يسيل وتمتلي منه الشعاب=لكن يالله تحفظ الفالح لعين اوميته

يا هون ذبح أمّ القرين اللي تحرث عن النصاب=ما همّت اللي في حزامه شايلٍ جنبيّته !!!
ان كان سال السيل فافتح فمك و أبشر بالشراب=لو مات ابو شيما ما أحد يبكيه غير بنيّته !!!

اثر السلامه ياعلي شيلت يديّ عن التراب=اللي لقينا في وجيه اخصامنا ماريته
هذاك قسمك وان بغيت الصدق والعلم الصواب=شكلك مثل شكله ودايم هيتك في هيته

طول الزمان أنته سوات الفار تسعى بالخراب=شرواك و الله ما ينومس لو نتفت لحيّته !!!!
حنّا الرجال اللي علينا العلم ما نحسب حساب =للّي ليا جات المواقف يدّرق باوخيّته