ما دام سعود حاضر والعرب تثني بهرج سعود = على الله ياسعود وحضّر الافكار قدامي
ترشح غازي الياور وحطو له حرس وجنود = ولحّق فالزعيم اللي مضى ما كمّل العامي

على الله يازياد ان كنت رجال تحب الزود = ابا انزلك فالبحر الحمر وتصير عوامي
نعرف ان البعير شعيل غير الحاشي المفرود = ومهما صار مانلقى مثل صدام صدامي

مسيّر مانته مخيّر وهرجك بالوفا مردود = ترا حبل المطيه في يدي بطيب والزامي
على الشعب العراقي ست حكام وبليا فود = على ورد العدود الراهيه ما يامن الضامي

ترى وقتي معك محدود وانا ماني بمحدود = اركب لك لغم وتضيع في تفجير الالغامي
حليلك يالمطيري وانت لاغايب ولاموجود = علشانك يتيم ونحسبك من ضمن الايتامي

ترا هرجٍ تقوله ما علاه سناد ولاّ شهود = يعيبك والنتيجه عظةٍ من فوق الابهامي
مشت ياشاعر عتيبه ولا ياحظك المقرود = تنشّد كان ربي مد لك فالموقف الحامي

على راس الشطيطي كل ماهبت هبوب النود = تحيزم لهٍ بمحزم وانطلق مع جرة الرامي
هاذي حيلة قديمة والحيالة ريعها مسدود = تعيّن لك طريقة تسعفك يامحمل الشامي

حزامي ما ارتخى والفعل من هيبة سطا المجرود = على حده نسوق اللي معه بارود وحزامي
بعد فشلت ربعك فاللقا واللي معانا قعود = عساها ماتنزل رتبتك من مصدرٍ سامي

علامك يالغليّم يوم تنقز حدك المحدود = تحاول في بضاعة بايرة ماعاد تنسامي
لو انك تحتمل شرهة ورجل تعرف المنقود = لا اقول انك ذريعة داخلة في دين الاسلامي

بعد طفنا وسعينا ثم رمينا الخاسي المقصود = توكلنا على الله ماني بملزوم بحرامي
حليلك ودّك تسوي سواتي تبذل المجهود = (ذريعه) من قرايبكم وانا رجال وانظامي