سرى الليل والمعنى على راس مرقاب = في قاعه غدير وفوق راسه غمامه
نبا نرهب الشعار ونزيد الارهاب = ونطا على راسه وناخذ حزامه

سرى الليل والمعنى مفاتيح الابواب=من البيت الابيض لين قصر اليمامه
نبا نذبح الحيه قبل ذبحت الداب=قبل لا تطير ولا تحن الحمامه

ياحوت البحر بطن البحر كله اعشاب = ولا فيه طعس ٍ مثل طعس الثمامه
ترا آخر حياتك تنتهي عند قصاب = يخليك تونه ياحياة الندامه

ترى الفرق بين الروس شاسع والذناب=تهايط تبا الميسم يشق البجامه
ترى الحوت لو حطك على الظرس والناب=يبا يرتخي راسك ياراس النعامه

ترانا رجالن نقطع يدين ورقاب = ولو نلزم المشبوه نكسر عظامه
لقيتك من البارح تسحٌب فالاسياب = تبالك من التجار ثوب وعمامه

هذولاك عيال العود ولاأ نت نصاب=أظنك شبيه بليه مادري اوبامه
من البارحه وأنته معى راعي القلاب=تديره تبا منه شداد ومسامه

إلا يامعين تعين ابو زيد وذياب = ابو زيد عايف من سوالف دلامه
علومه علوم الي معه ضغط واعصاب = ولا ودنا ناخذ ذنوبه واثامه

ابو زيد لو أنه حسب للرجال أحساب=ماعاف الهروج ولا تكدر منامه
تمس الشنب قدام عكفان الاشناب=وحوت البحر غابنك صوت للتطامه

انا مانويت اقلعلك الضرس والناب = علشان مايجرح عميلك صيامه
على الله ياوقت ٍ جمع شايب وشاب = انا ماغبني غير دمع اليتامه

إلى يامجلي في دجى الليل الضباب=تحقق لفرهود المخضرم حلامه
يبا يكحل الشايب وعمى العين ولاهداب=يحسب الكبر يعفيه دفع الغرامه