انا إلي وجهة نظر عن بعض راعين الوسام = والمملكه لازم تعيد احسابها وانظارها
الشاعر اللي مايفرق بالحلال امن الحرام = وشلون شال البندقه ولا عرف معيارها

لو كان تعرضها على الساده رفيعين المقام = يمكن رفيعين المقام اتعدّلك باشوارها
اليا رفعت الصوت قدم الناس ماظنك تلام = يمكن نقلك ياعقاب اتقنت حسن اشعارها

ياصاحبي من بعد ماغرّيت زاهية الوشام = احسن لكم شدّو على ديار ٍ ماهي بديارها
العالم الله ماندور في هلا الصحبه كلام = لكن كل لحيه ننزلها على مقدارها

حنّا ماغرّينا الوفا في حرب ولا في سلام = لكن هذي جات لك من غير ماتختارها
افرح شويه بعد حظك مع رجال العرف قام = العام ضمن اصغارها واليوم ضمن اكبارها

الله ُ اكبر يالعلوم اللي تجينا شرق شام = نضحك على ميرادها نضحك على مصدارها
تتهم رجال المعرفه وانته عليك الاتهام = حنا الرجال اللي تطول ولاتبيح اسرارها

اعلومكم سهله وعندي مالها ربع اهتمام = اعلومكم ياهونها بطوالها واقصارها
تبا تبيح اسراركم اليا نوينا الانتقام = اخترت طرقه ياعقاب ايطول بك مشوارها

المشكله بالهينه ماعطيتها بعض احترام = ولا ّ العلوم الثانيه لاتكشفون استارها
انا متولم للمهمه فالذخيره والحزام = حفرتك وش تبعد من الامتار ياحفّارها !!

يمكن من الفرحه عيونك ماتهنّا بالمنام = تستاهل الطيّب من ارجال" طوال اشبارها
ابغاك جاهز لين احطلك القلاده والزمام = حتى سلعنا الغاليه ماترخصون اسعارها