خيال فالمناشي بارقه يبرق وفيه رعود=مقاديمه تصب الماء وفالمنشى يرفّاله
لكن الله يجيبه لين يمطر فوق راس سعود=ويضهر نفسه من السيل ولاّ السيل يشتاله

عسى مقسوم خير من المطر يارب يامعبود = يغيث اهل البلاد ويكفي الجمّال وجماله
وانا في راس هضبة ماتحركها هبوب النود = يالاصعر من قعد وسط المسيلة حالته حاله

عسى ربي يبارك في عميل(ن) يدرك المقصود=وينفع به عتيبه والله يخليه لعياله
ابا اولّع عليك النار فالميدان لين تجود=ترى كل(ن) جزاه يحصله عندي من اعماله

جزاك الله على نيتك ياللي تبذل المجهود = على فالك يالاصعر والعرب كل على فاله
ليا ولعت نارك لاينوشك من حطبها عود = وتزعل منك روق اللي مع اهل الخيل خياله

ابوزيد الهلالي مابلش فالنار والبارود=يطب المعركه مالدّ لشماغه ولعقاله
كثير من العرب وقت مضى في ضل روق رقود=وذلحينه طلع خيّال في برقا يوراله

الا يافكرتي وشلون صار النقص مثل الزود = يدورن الليال وكل عقد يجيه حلاله
تراني مابغيتك تنجرف في دربك المسدود = لكنك صرت مستعجل وصار الحال يرثاله

اضنّك ياعميلي زدت عقدة حبلك المعقود=طمعت بمنتدى الهيلا وجتك القوم منهاله
ترانا مانباك تصيبك صدوف الليال السود=نبا علم السعد يارجل يبرالك وتبراله

يابن ثعلي جمال عقيل فيها الهرش والمفرود = وانا جودت كل بعير بقياده وبعقاله
لعلك كل ساعة ياوسيع المعرفة موجود =علشانك ولد عم البطل مدري ولد خاله