ياذيب كن اعواك ماودي اوحيك ( صاحب القصيده )
 

هذه القصيد لعمي الشيخ / عتيق بن وصل الله المطيري

من سكان محافظة المجمعه

وقد آثرت نشرها لكثرة السؤال عن قائلها

ياذيب كن اعــواك ما ودي اوحيـــك

واليا ســمعت اعواك قلبـي يلجـــي

وياذيب ما ني غــاوي اللي يعويـك

كما واحد من حســتـه مســــــتمجـي

عســاك مانته فاقد اهلـك وغاليــــك

مدري قنيــــب اليــاس والا ترجـــي

اصبر كما صبـــري على كل ما يجيــك

والله ينـادي بالســـعـد والفرجـــي

انكان نـدك جـــوع تعـال اعشــــيـك

وابيك تســـكن عندنـا مـا تهجـــي

اقـــدم المـاجـــود والله يحيـيـــك

ورزقي على اللي مــاش دونه ملجـــي

واليا بغيــت تروح قلـي واخــاويـك

ودي بــدرب الذيب مع كـل فجـــــي


ابايعـــك واعـادي اللـي يعاديـــك

ومــن وين ما ســــجيت حالف لأســجي

شــوقتني ياذيب ما ازيـن معــاديـك

اليا اختلــط بالليـل بـرد وعجـــي

ولا تصبــح الا في عــلاوي محــاجيـك

واللي يبــي يقتلـك ياذيـب دجــي

ياذيب لا تــوذي عليـه ولا اوذيـــك

في راس مـــرقاب الخـــلا نندمجـي

وان جاك ضــده من عدوك ما اخليـــك

وعيــب على اللي خــوته ما تنجـي

ياذيب عــاهدني واعاهدك ما ارميك

وان بقــت بايق في صيــامي وحجــي

وعيــب على اللي خــوته ما تنجـي


أبداع
شاعر صادق
صح الساااااانه والسانك يالغالي

شاكر لك من القلب اخوي عبدالرحمن الهيلوم

هذا الاحساس

وأن دل على شيء فإنما يدل على عظم شخصك الكريم

ارق التحايا لكم

تسلم اخوي خالد نوار

وبيض الله وجهك على هالتفاعل الغبر مستغرب

منك ومن لابتك

ووصلت تحياتك بكل دفء

اخوي عبدالله الجذع

احبك الله في مااحببت

وشاكر لك في نفس الوقت هذا الاطراء الغير مستغرب

من رجل من رجال الهيلا

وهذا التفاعل من قبلك

تحياتي ،،،

عند دخولي لاأحد المواقع وجدت ان القصيده

منسوبه للشاعر المرحوم صقر النصافي

وانا من هنا اؤكد ان هذا غير صحيح

تحياتي للجميع ،،،