الله من قلبن تزايدأوجاعه=له مدتن سهران والهم كاويه
كوية مريضن مالقوبه مناعه=زادت معاناته وكثرت شكاويه
سهران لين الصبح بين شعاعه=يطلب رجى ربه عسى الله ينجيه
ذكرت أبو‎(زايد)‎ حسين الطباعه=يفرح ليامن جيت عاني وناصيه
منولن يفرح بشوف الجماعه=واليوم طاح ولحدن يلتفت فيه
عودن على الطالات يوفي بصاعه=ياقل منهو بالمراجل يماشيه
إلياهرج هرجه بفصح وبراعه=ماتعتع بهرجه عسى الله يعافيه
حافظ على دنياه والرب طاعه=والفرض مافاته بوقته يصليه
ماهوب من ناسن كثير الصعاعه=مشوهين الناس بالهرج تشويه
ضارين بالنمه ومعها قطاعه=لاشفت واحدهم كبارن علابيه
دنياه ياخـــذها بصبر و قناعه=ماكثرشماته وضاعت هقاويه
منولن يسكن براس الرفاعه=مشيدن بيتن طوالن قواريه
بيتن على الطالات ترفع رباعه=والعودالأزرق دايرن في نواحيه
مع دلتن صفرا تصلح بساعه=والضيف لا شافه قحص له يحييه
يحط له حيلن بسن الرباعه=والجاريرسل له مراسيل تدعيه
واليوم وسط الدارقل إستماعه=كثرت همومه مالقى من يسليه
مثل الرضيع اللي بسن الرصاعه=لاقفى عن امه قامت امه تناديه
أثرالجمل لاطاح كثرت أسباعه=كثرت عذاريبه وبان الخلل فيه
ياالله يامعبود منك الشفاعه=يارازق المحتاج لارفع يديه
تغفر ذنوب العود ساعة وداعه=لا ودع الدنيا وقفت سوانيه

/عبد العزيز الجذع\ ,, فهد النفيعي

لاهنتــــــــــوا وعطرتوا الموضوع بردودكم

ودمتم بود